കരുനാഗപ്പള്ളി: ലാലാജി ജങ്ഷനില് പ്രവര്ത്തിച്ചിരുന്ന ബിവറേജസ് ഔട്ട്ലറ്റ് മാളിയേക്കല് ലവല്ക്രോസിനു സമീപമുള്ള വെയര്ഹൗസ് കോര്പ്പറേഷന് ഗോഡൗണിലേക്ക് മാറ്റിസ്ഥാപിച്ചതിനെതിരെ പ്രതിഷേധം ശക്തമാകുന്നു.
തിരക്കേറിയ കരുനാഗപ്പള്ളി ശാസ്താംകോട്ട റോഡിന്റെ സമീപത്തായാണ് ഗോഡൗണ് പ്രവര്ത്തിക്കുന്നത്. ലവല് ക്രോ സ് അടയ്ക്കുമ്പോള് കിലോമീറ്ററുകള് ദൂരത്തില് വാഹനങ്ങളുടെ നീണ്ടനിര രൂപപ്പെടുന്ന ഇവിടെ മദ്യശാല കൂടിയായതോടെ വാഹനങ്ങള്ക്ക് കടന്നുപോകാന് പറ്റാത്ത അവസ്ഥയായി. മദ്യശാലകള്ക്കെതിരെ ജനകീയ പ്രക്ഷോഭം ശക്തമായതോടെ വളരെ രഹസ്യമായാണ് ഔട്ട്ലറ്റ് ഇവിടെ പ്രവര്ത്തനം തുടങ്ങിയത്. പ്രവര്ത്തനം തുടങ്ങിയതിനു ശേഷം മാത്രമാണ് മദ്യശാല തുറന്നു പ്രവര്ത്തിച്ച വിവരം നാട്ടുകാര് പോലും അറിയുന്നത്. എന്തുവില കൊടുത്തും മദ്യശാലകള് പ്രവര്ത്തിപ്പിക്കുക എന്ന ഇടതുമുന്നണി നയത്തിന്റെ ഭാഗമായാണ് ഇടതുഭരണം കയ്യാളുന്ന പഞ്ചായത്തും സ്ഥലം എംഎല്എയും മുന്കൈ എടുത്ത് ഗോഡൗണില് ഔട്ട്ലറ്റ് സ്ഥാപിച്ചത്. ഇതിന്റെ മുന്നോടിയായി ഗോഡൗണിന്റെ പിന്വശത്തുകൂടി പ്രവേശിക്കുന്നതിനായി പുതിയ ഗേറ്റും സ്ഥാപിച്ചു. മെയിന് റോഡില് നിന്നും ഇടുങ്ങിയ വഴിയില് കൂടി ഇവിടെ എത്തി മദ്യം വാങ്ങുന്നതിനുള്ള സൗകര്യം ഒരുക്കിയെങ്കിലും ബിവറേജസില് എത്തുന്നവരുടെ വാഹനങ്ങള് റോഡിന്റെ ഇരുവശങ്ങളിലും പാര്ക്ക് ചെയ്തതോടെ ഇതുവഴി യാത്ര ചെയ്യാന് പോലും പറ്റാതായി. ഇതോടെ നാട്ടുകാര് പ്രതിഷേധവുമായി രംഗത്തെത്തി. പുതിയതായി നിര്മ്മിച്ച ഗേറ്റ് ഉപരോധിക്കുകയും ചെയ്തു. പ്രതിഷേധം മൂലം പിന്നീട് ഗേറ്റ് അടച്ച് വെയര്ഹൗസിലേക്കുള്ള പ്രധാനവഴിയിലൂടെ ബിവറേജസില് പ്രവേശിപ്പിക്കാനുള്ള സൗകര്യമുണ്ടാക്കുകയായിരുന്നു.
എഞ്ചിനിയറിങ്ങ് കോളേജും ക്ഷേത്രവും ഉള്പ്പെടെ ജനങ്ങള് തിങ്ങിപാര്ക്കുന്ന പ്രദേശത്ത് നിയമങ്ങള് ലംഘിച്ചുകൊണ്ടാണ് ഔട്ട്ലറ്റ് പ്രവര്ത്തനം ആരംഭിച്ചത്. ജനകീയ പ്രതിഷേധം ഇല്ലാതാക്കാന് പെറ്റി അടിയ്ക്കുമെന്ന് പോലീസ് അഡ്വാന്സ് നോട്ടീസ് പതിച്ചിട്ടുണ്ട്. സമരക്കാരെ വേണ്ട രീതിയില് കൈകാര്യം ചെയ്യുമെന്ന് എക്സൈസ് ഉദ്യോഗസ്ഥര് ഭീഷണിപ്പെടുത്തുന്നതായും പരാതി ഉയരുന്നു.
സ്ത്രീകള്ക്ക് 2500 രൂപയും പുരുഷന്മാര്ക്ക് 5000 രൂപയുമാണ് പെറ്റി ചുമത്തുന്നത്. ഓച്ചിറയില് പ്രവര്ത്തിച്ച ബിവറേജസ് ഔട്ട്ലറ്റ് തഴവയിലേക്ക് മാറ്റുന്നതിനെതിരെ നടന്ന പ്രതിഷേധസമരത്തിലും ഇത്തരം പെറ്റിഭീഷണി ഉയര്ത്തിയെങ്കിലും ശക്തമായ പ്രക്ഷോഭത്തിലൂടെ ബിവറേജസ് പാവുമ്പയിലേക്ക് മാറ്റിച്ചു. ഏതുവിധേനയും മദ്യശാല ഇവിടെ തന്നെ പ്രവര്ത്തിപ്പിക്കുമെന്ന തീരുമാനത്തിലായത് കൊണ്ടാണ് സര്ക്കാര് സ്ഥാപനം തന്നെ മദ്യശാലയ്ക്കായി തുറന്നുകൊടുത്തതും. ഇതിനെതിരെ ശക്തമായ പ്രതിഷേധമാണ് നാട്ടില് ഉയരുന്നത്.
