പയ്യന്നൂര്: നാവിക അക്കാദമിയിലെ മലിനജലം മൂലം ദുരിതം പേറുന്ന രാമന്തളിയിലെ ജനത ഇന്ന് വിഷു ആഘോഷങ്ങള് ഒഴിവാക്കി കൂട്ട ഉപവാസം അനുഷ്ഠിക്കും. നാവിക അക്കാദമി മാലിന്യപ്ലാന്റ് അടച്ചു പൂട്ടുക എന്ന് ആവശ്യപ്പെട്ട് ജനആരോഗ്യ സംരക്ഷണ സമിതി നടത്തുന്ന അനിശ്ചിതകാല സമരപന്തലിലാണ് ഒരു നാടിന്റെ ശുദ്ധജലം സംരക്ഷിക്കുവാന് ഒരു ജനത ആഘോഷങ്ങള്ക്ക് വിട നല്കി കൂട്ട ഉപവാസ സമരം നടത്തുക. അനിശ്ചിതകാല സമരപന്തലില് ടി.കെ.മനോജ് കുമാറിന്റെ നിരാഹാര സമരം ഏഴാം ദിവസത്തിലേക്ക് കടന്നു. വിഷു ആഘോഷമില്ലാതെ നിരാഹാരം അനുഷ്ഠിക്കുന്ന മനോജ് കുമാറിനോട് അനുഭാവം പ്രകടിപ്പിക്കുന്നതോടൊപ്പം ശുദ്ധജലമില്ലാത്ത ആഘോഷങ്ങള് നിരര്ത്ഥകമാണെന്ന് ചൂണ്ടിക്കാട്ടിയാണ് വിഷുദിനത്തില് കൂട്ട ഉപവാസം നടത്തുക.
അനിശ്ചിതകാല സമരം നാല്പ്പത്തി അഞ്ചാം നാളിലേക്ക് കടന്നു. സമരത്തിന് ഐക്യദാര്ഢ്യവുമായി ഒട്ടേറെ പേര് സമരപന്തലിലെത്തി. മലബാര് വികസന സമിതിയുടെ നേതൃത്വത്തില് പ്രവര്ത്തകര് ഐക്യദാര്ഢ്യ ഉപവാസം നടത്തി. ഉപവാസം ഡോ.ഡി.സുരേന്ദ്രനാഥ് ഉദ്ഘാടനം ചെയ്തു. കെ.ആര്.അബ്ദുള് ഖാദര് അധ്യക്ഷത വഹിച്ചു. ദീപു ജോണ്, മനു ഫ്രാന്സിസ്, ആര് കുഞ്ഞികൃഷ്ണന്, വിനോദ് രാമന്തളി എന്നിവര് സംസാരിച്ചു. മലബാര് വികസന സമിതി പ്രസിഡന്റ് അഡ്വ.ബിനോയ് തോമസിന്റെ നേതൃത്വത്തില് അന്വര് കരുവഞ്ചാല്, കെ.പി.സത്യന് , മൊയ്തീന് നാടുകാണി എന്നിവരാണ് ഉപവാസം അനുഷ്ഠിച്ചത്. വൈകുന്നേരം കെ.മുരളീധരന് ഇവര്ക്ക് നാരങ്ങനീര് നല്കി ഉപവാസം അവസാനിപ്പിച്ചു.
