കോട്ടയം: 2019 ലെ ലോക്സഭാ തെരഞ്ഞെടുപ്പിനായി കോട്ടയം പാര്ലമെന്റ് മണ്ഡലത്തിലെ ബിജെപിയുടെ തെരഞ്ഞെടുപ്പ് ഒരുക്കങ്ങള്ക്ക് ഇന്ന് തുടക്കമാകും. പ്രവര്ത്തനങ്ങള്ക്ക് തുടക്കം കുറിച്ചുള്ള കണ്വന്ഷന് കോട്ടയം ഇന്ദ്രപ്രസ്ഥം ഓഡിറ്റോറിയത്തില് ഉച്ചയ്ക്ക് 2ന് മുന് കേന്ദ്രമന്ത്രിയും ബിജെപി ദേശീയ വക്താവുമായ ഷാനവാസ് ഹുസൈന് ഉദ്ഘാടനം ചെയ്യും. ബൂത്ത് ഭാരവാഹികള് പങ്കെടുക്കുന്ന കണ്വന്ഷനില് മണ്ഡലത്തിലെ തെരഞ്ഞെടുപ്പ് പ്രവര്ത്തനങ്ങള്ക്ക് അദ്ദേഹം മാര്ഗ്ഗനിര്ദ്ദേശങ്ങള് നല്കുമെന്ന് സംസ്ഥാന വക്താവ് എസ്.ജയസൂര്യന്, ജില്ലാ പ്രസിഡന്റ് എന്.ഹരി, ജനറല് സെക്രട്ടറി കെ.പി.സുരേഷ് എന്നിവര് പത്ര സമ്മേളനത്തില് പറഞ്ഞു.
ഒരു പാര്ലമെന്റ്് മണ്ഡലത്തിലെ തെരഞ്ഞെടുപ്പ് പ്രവര്ത്തനങ്ങള്ക്ക് ദേശീയ നേതാവടക്കം മൂന്ന് പേരെയാണ് നിയോഗിച്ചിരിക്കുന്നത്. ഇതനുസരിച്ച് കോട്ടയം മണ്ഡലത്തിന്റെ ചുമതല ഷാനവാസ് ഹുസൈനാണ്. സംസ്ഥാന നേതാക്കളായ വി.വി. രാജേഷ്, എസ്. ജയസൂര്യന് എന്നിവരാണ് മറ്റ് രണ്ട് പേര്. വരുന്ന പാര്ലമെന്റ് തെരഞ്ഞെടുപ്പിനായി ഏത്് തരത്തിലുള്ള ഒരുക്കമാണ് നടത്തേണ്ടതെന്ന് ഇവര് നിര്ദ്ദേശിക്കും. സമ്മേളനത്തെ തുടര്ന്ന് ഘട്ടംഘട്ടമായി ചിട്ടയായുള്ള തെരഞ്ഞെടുപ്പ് പ്രവര്ത്തനങ്ങളും ഉണ്ടാകുമെന്നും അവര് അറിയിച്ചു. കാഞ്ഞിരപ്പള്ളി, പൂഞ്ഞാര് എന്നീ മണ്ഡലങ്ങള് ഉള്പ്പെടുന്ന പത്തനംതിട്ട മണ്ഡലത്തിലെ കണ്വന്ഷന് 13ന് കേന്ദ്രമന്ത്രി മഹേഷ് ശര്മ്മ ഉദ്ഘാടനം ചെയ്യും. ചങ്ങനാശേരി മണ്ഡലം ഉള്പ്പെട്ട മാവേലിക്കര മണ്ഡലത്തിലെ കണ്വന്ഷന് 15ന് നടക്കും.
വരുന്ന പാര്ലമെന്റ് തെരഞ്ഞെടുപ്പില് കോട്ടയം മണ്ഡലം പിടിച്ചെടുക്കാന് സാധിക്കുമെന്ന് നേതാക്കള് പറഞ്ഞു. ന്യൂനപക്ഷങ്ങള് ഏറെയുണ്ടായിരുന്ന പഴയ മൂവാറ്റുപുഴ മണ്ഡലത്തില് എന്ഡിഎ സ്ഥാനാര്ത്ഥിയായിട്ടാണ് പിസിതോമസ് മത്സരിച്ച് ജയിച്ച് കയറിയത്. പുതിയ സാഹചര്യത്തില് പഴയ മൂവാറ്റുപുഴ മണ്ഡലത്തിന്റെ ഭാഗങ്ങള് ഉള്പ്പെട്ട കോട്ടയം മണ്ഡലത്തില് ജയിക്കാനാകുമെന്നും അവര് വ്യക്തമാക്കി.
സിപിഎമ്മിനുള്ളില് ഉണ്ടായിരിക്കുന്ന ആശയ സംഘര്ഷങ്ങളും ഭിന്നിപ്പുകളും മൂലം പ്രവര്ത്തകര് പാര്ട്ടി വിടുകയാണ്. ഇങ്ങനെയുള്ളവര് ശരിയെന്ന് കരുതുന്ന ബിജെപിയിലേക്കാണ് വരുന്നത്. ഇതിലുള്ള അസഹിഷ്ണത സിപിഎം പ്രകടിപ്പിക്കുന്നത് അക്രമത്തിലൂടെയാണ്. കുമരകം മേഖലയിലെ സിപി എം അക്രമത്തെ പരാമര്ശിച്ച് കൊണ്ട് നേതാക്കള് പറഞ്ഞു. ബിജെപിയുടെ നയപരിപാടികളുമായി യോജിച്ച് പോകാന് തയ്യാറുള്ള ആര്ക്കും പാര്ട്ടിയുമായി സഹകരിക്കാമെന്നും അവര് വ്യക്തമാക്കി.
