നഗോയ: ഏഷ്യന്‍ ഗെയിംസില്‍ മലയാളത്തിന്റെ കീര്‍ത്തി അലകടലോളം വിസ്തൃതമാക്കി പായ്‌ക്കപ്പലോട്ട(സെയിലിങ്) മത്സരത്തില്‍ രണ്ട് മലയാളി താരങ്ങള്‍ ചരിത്ര വെള്ളി സ്വന്തമാക്കി. പുരുഷ സെയിലിങ് സ്‌കിഫ്(49 ഇആര്‍) വിഭാഗത്തില്‍ എറണാകുളം വരാപ്പുഴ സ്വദേശി മനു ഫ്രാന്‍സിസ്, വൈപ്പിന്‍ പള്ളിപ്പുറം സ്വദേശി പ്രിന്‍സ് കുരിശിങ്കല്‍ നോബിള്‍ എന്നിവരുള്‍പ്പെട്ട സഖ്യം ആണ് രണ്ടാം സ്ഥാനത്ത് ഫിനിഷ് ചെയ്തത്. ഈ ഇനത്തില്‍ ചരിത്രത്തില്‍ ആദ്യമായാണ് ഭാരതം വെള്ളി നേടുന്നത്. കഴിഞ്ഞ തവണ ഇതേ സഖ്യം ഈ ഇനത്തില്‍ വെങ്കലം നേടിയിരുന്നു.
ഒരു ഘട്ടത്തില്‍ നാലാം സ്ഥാനം വരെ പിന്നിലായി പോയ മനുവും പ്രിന്‍സും ഗംഭീര തിരിച്ചുരവിലൂടെ മെഡല്‍ നേടിയെടുക്കുകയായിരുന്നു. മനു- പ്രിന്‍സ് സഖ്യത്തിന്റേതടക്കം ഭാരതത്തിന് ഇന്നലെ രണ്ട് വെള്ളികള്‍ ലഭിച്ചു. പുരുഷന്മാരുടെ ഗ്രീക്കോ റോമന്‍ 97 ഗുസ്തി ഫൈനലില്‍ പരാജയപ്പെട്ട നിതേഷ് സിവാച്ച് ഭാരതത്തിന്റെ വെള്ളിനേട്ടം ഉയര്‍ത്തി. ഫൈനലില്‍ ജപ്പാന്റെ യൂരി നകാസാറ്റോയോടാണ് പരാജയപ്പെട്ടത്. സ്‌ക്വാഷ് പുരുഷ, വനിതാ ടീം ഫൈനലില്‍ ഭാരതം രണ്ടിലും പരാജയപ്പെട്ട് രണ്ട് വെള്ളി കൂടി മെഡല്‍ പട്ടികയില്‍ ചേര്‍ത്തു. ഹോക്കി സെമിയിലിറങ്ങിയ ഭാരതം ചിരവൈരികളായ പാകിസ്ഥാനെ കീഴടക്കി ഫൈനലിലേക്ക് കുതിച്ചു. ആവേശപോരാട്ടത്തില്‍ 4-3നായിരുന്നു ഭാരത വിജയം. ക്രിക്കറ്റ് സെമിയില്‍ ശ്രീലങ്കയെ 124 റണ്‍സിന് പരാജയപ്പെടുത്തിക്കൊണ്ടും ഭാരതം ഫൈനലിലെത്തി.
