കോട്ടയം: ഹിന്ദുജനതയെ മറ്റ് സമൂഹങ്ങളില് നിന്ന് മാറ്റി നിര്ത്തുന്ന ആദര്ശങ്ങളില് രാമായണത്തിന്റെ സ്വാധീനമുണ്ടെന്ന് കുടക്കച്ചിറ വിദ്യാധിരാജ സേവാശ്രമത്തിലെ സ്വാമി അഭയാനന്ദതീര്ത്ഥപാദര് അഭിപ്രായപ്പെട്ടു. വിശ്വഹിന്ദു പരിഷത്ത് ജില്ലാ സമിതിയുടെ ശ്രീരാമനവമി ജില്ലാതല ആഘോഷത്തിന്റെ ഭാഗമായി നടന്ന ഹിന്ദുമഹാസമ്മേളനം ഉദ്്ഘാടനം ചെയ്യുകയായിരുന്നു അദ്ദേഹം.
ആത്മീയ ഗ്രന്ഥങ്ങളില് ഏറ്റവും സ്വാധീനിച്ചത് രാമായണമാണ്. ആദര്ശ ഭരണാധികാരി, ആദര്ശ വനിത, ആദര്ശഭക്തന് എന്നിവ കേള്ക്കുമ്പോള് ശ്രീരാമന്റെയും സീതയുടെയും ഹനുമാന്റെയും രൂപങ്ങളാണ് മനസിലേക്ക് വരുന്നത്. രാഷ്ടപിതാവ് മഹാത്മഗാന്ധിയും രാമരാജ്യമാണ് ആഗ്രഹിച്ചതെന്നും അദ്ദേഹം പറഞ്ഞു.
രാമക്ഷേത്രത്തിന്റെ പുനര്നിര്മാണത്തിനുള്ള പോരാട്ടം തുടരുമെന്ന് മുഖ്യപ്രഭാഷണം നടത്തിയ വിഎച്ച്പി സംസ്ഥാന ജോയിന്റ് സെക്രട്ടറി പി.ജി.കണ്ണന് പറഞ്ഞു. രാമക്ഷേത്രത്തിനുള്ള പോരാട്ടം ആര്എസുംഎസും വിഎച്ച്പിയും പിറവിയെടുക്കുന്നതിന് മുമ്പേ തുടങ്ങിയതാണെന്ന് മതേതരത്വത്തിന്റെ കുത്തക അവകാശപ്പെടുന്നവര് മനസിലാക്കണം. സംഘടിത മതങ്ങള് അവരുടെ മതത്തിന്റെ ഭാഗമായിട്ടല്ലാത്തവരെ അധിക്ഷേപിക്കുകയാണ്. ഒരു കൂട്ടര് കാഫിര് എന്ന് വിളിക്കുമ്പോള് മറുകൂട്ടര് പാപികളെന്നാണ് വിളിക്കുന്നത്്. എന്നാല് സനാതനധര്മ്മത്തില് വിശ്വസിക്കുന്ന ഹൈന്ദവ സമൂഹം ഇങ്ങനെയല്ല ചിന്തിക്കുന്നതെന്നും അദ്ദേഹം പറഞ്ഞു.
ആര്എസ്എസ് വിഭാഗ് സംഘചാലക് എം.എസ്.പത്മനാഭന്, വിശ്വഹിന്ദു പരിഷത്ത് ജില്ലാ അധ്യക്ഷന് വി.ജി.രാമചന്ദ്രന്, ജില്ലാ സെക്രട്ടറി കെ.ആര്.ഉണ്ണികൃഷ്ണന്,സംഘടന സെക്രട്ടറി എം.കെ.ദിവാകരന്, ബ്രാഹ്മണ സമൂഹം പ്രസിഡന്റ് എച്ച്.രാമനാഥന്, മാതൃസമിതി സംസ്ഥാന അധ്യക്ഷ ശാന്താ എസ്് പിള്ള, മഹിളാ ഐക്യവേദി സംസ്ഥാന ജനറല് സെക്രട്ടറി ബിന്ദുമോഹന്, കെപിഎം.എസ് ജില്ലാ പ്രസിഡന്റ് വി.സി.തങ്കപ്പന്, എകെസിഎച്ച്എംഎസ് താലൂക്ക് യൂണിയന് പ്രസിഡന്റ് പി.ടി.ബാബു, വേളാര് സര്വീസ് സൊസൈറ്റി ജില്ലാ പ്രസിഡന്റ് അഡ്വ.കെ.ആര്.സുരേന്ദ്രന്, കാക്കാല മഹാസഭ ജില്ലാ പ്രസിഡന്റ് കെ.എസ്.സദാശിവന്, കെ.മുരളീധരന്, കൊളപ്പുറത്ത് ശങ്കരന്കുട്ടി തുടങ്ങിയവര് പ്രസംഗിച്ചു.
സമ്മേളനത്തിനോട് അനുബന്ധിച്ച് അയോധ്യയില് കര്സേവാ പ്രവര്ത്തനത്തില് പങ്കെടുത്ത കര്സേവകരെ ആദരിച്ചു. രാമായണ പാരായണ, സപ്താഹ ആചാര്യന്മാരെയും ആദരിച്ചു.
