കോട്ടയം: പാടശേഖരങ്ങളില് നിന്ന് നെല്ല് സംഭരിക്കാത്തതില് പ്രതിഷേധിച്ച് യൂത്ത് ഫ്രണ്ട് (എം) പ്രവര്ത്തകര് സപ്ലൈക്കോ റീജണല് ഓഫീസ് ഉപരോധിച്ചു.
കേരള കോണ്ഗ്രസ് (എം ) സംസ്ഥാന ജനറല് സെക്രട്ടറി അഡ്വ. ജോബ് മൈക്കിള് ഉദ്ഘാടനം ചെയ്തു. അപ്പര് കുട്ടനാട്, കുട്ടദാട് മേഖലയിലെ നെല്ല് സംഭരണം കാര്യക്ഷമമാക്കി നെല്കര്ഷകരെ രക്ഷിക്കാന് സര്ക്കാര് അടിയന്തിര നടപടി സ്വീകരിക്കണമെന്ന് അദ്ദേഹം ആവശ്യപ്പെട്ടു. ജില്ലാ പ്രസിഡന്റ് പ്രസാദ് ഉരുളികുന്നം അധ്യക്ഷനായി.
സംസ്ഥാന പ്രസിഡന്റ് സജി മഞ്ഞക്കടമ്പില്, ഷാജി പുളിമൂടന്, രാജന് കുളങ്ങര തുടങ്ങിയവര് നേതൃത്വം നല്കി. സംഭരണത്തിലെ പ്രശ്നങ്ങള് പരിഹരിക്കാന് നേരിട്ട് ഇടപെടാമെന്ന റീജണല് മാനേജരുടെ ഉറപ്പിനെ തുടര്ന്നാണ് ഉപരോധം അവസാനിപ്പിച്ചത്.
