രാമപുരം: പ്രധാന റോഡിനോട് ചേര്ന്ന് പ്രവര്ത്തനം ആരംഭിച്ച രാമപുരം ബീവറേജസ് വഴിയാത്രക്കാര്ക്ക് പോലും ശല്യമാകുന്നു. പാലാ, കൊല്ലപ്പിള്ളി തുടങ്ങി സമീപ പ്രദേശങ്ങളിലെ മദ്യ ഷോപ്പുകള് എല്ലാം അടച്ചതോടെ രാമപുരത്തെ ബീവറേജസില് രാവിലെ മുതല് രാത്രിവരെ വന് തിരക്കാണ്. കാല്നട യാത്രക്കാര്ക്കുപോലും അതുവഴി സഞ്ചരിക്കുവാന് പറ്റാത്ത രീതിയിലുള്ള ജനക്കൂട്ടമാണ് പ്രദേശത്ത്. ക്യൂവിന് ഇടയ്ക്ക് കയറുവാന് ശ്രമിക്കുന്നതും തിരക്കു കൂട്ടുന്നതും മിക്കപ്പോഴും ഇവിടെ സംഘര്ഷത്തിലാണ് കലാശിക്കുന്നത്. തിരക്കുള്ള മെയിന് റോഡായതിനാല് ഇവിടെ വന് അപകട സാധ്യതയും നിലനില്ക്കുകയാണ്. ഇതിനോടകം തന്നെ ഇവിടെ നിരവധി അപകടങ്ങള് ഉണ്ടായിട്ടുണ്ട് തിരക്ക് വര്ദ്ധിച്ചതോടെ ഇനിയും അപകടങ്ങള് ഉണ്ടാകുമെന്ന ആശങ്കയിലാണ് നാട്ടുകാര്.
രാഷ്ട്രീയ നേതാക്കളും, പൊതുപ്രവര്ത്തകരും എക്സൈസ് മന്ത്രി ഉള്പ്പെടെയുള്ളവര്ക്ക് നിരവധി പരാതികള് നല്കിയിട്ടുണ്ട്. സ്ത്രീകളും, കുട്ടികളും ഭീതിയോടെയാണ് ഇതുവഴി കടന്നുപോകുന്നത്. ടൗണിന്റെ തിരക്ക് കുറഞ്ഞ പ്രദേശത്തേയ്ക്ക് ഇത് അടിയന്തിരമായി മാറ്റി സ്ഥാപിക്കണമെന്ന് എല്ലാ രാഷട്രീയ പാര്ട്ടികളും നാട്ടുകാരും ശക്തമായി ആവശ്യപ്പെട്ടിട്ടും നടപടികള് ഉണ്ടാകാത്ത സാഹചര്യത്തില് സമരപരിപാടികള് ആരംഭിക്കാനുള്ള തീരുമാനത്തിലാണ് നാട്ടുകാര്.
