പഴയങ്ങാടി: കണ്ണപുരത്ത് ബിജെപി നേതാവിന്റെ കട സിപിഎം സംഘം തകര്‍ത്തു. ബിജെപി കല്യാശ്യേരി മണ്ഡലം സെക്രട്ടറി സി.വി.സുമേഷിന്റെ ഉടമസ്ഥതയില്‍ കണ്ണപുരം മൊട്ടമ്മല്‍ പോസ്റ്റോഫീസിന് സമീപമുളള കണ്ണപുരം ഫ്രൂട്‌സ് ആന്റ് വെജിറ്റബിള്‍സ് എന്ന കടയാണ് തിങ്കളാഴ്ച പുലര്‍ച്ചെ 1.30 ഓടെ തകര്‍ത്തത്. ഒരു വര്‍ഷത്തിനുള്ളില്‍ നാലാം തവണയാണ് സിപിഎം അക്രമികള്‍ ഇയാളുടെ കട തകര്‍ക്കുന്നത്. കടയുടെ ബോര്‍ഡുകളും ഫര്‍ണ്ണിച്ചറുകളും അക്രമിസംഘം തകര്‍ത്തു. സിപിഎം ശക്തികേന്ദ്രമായ മൊട്ടമ്മലില്‍ കാലങ്ങളായി സിപിഎം ഇതര രാഷ്‌ട്രീയ സംഘടനകളുടെ പ്രവര്‍ത്തകരെ സിപിഎം സംഘം അക്രമിക്കുന്നത് പതിവ് സംഭവമായി മാറിയിരിക്കുകയാണ്. അക്രമികള്‍ക്കെതിരെ ശക്തമായ നടപടികളെടുക്കാന്‍ പോലീസ് തയ്യാറാവാത്തത് തുടര്‍ അക്രമങ്ങള്‍ക്ക് സിപിഎം അക്രമി സംഘത്തിന് പ്രേരണയാവുകയാണ്. ബിജെപി മണ്ഡലം സെക്രട്ടറിയുടെ കടക്കു നേരെ അക്രമം നടത്തിയ പ്രതികളെ എത്രയും പെട്ടെന്ന് നിയമത്തിന് മുന്നില്‍ കൊണ്ടുവരണമെന്ന് ബിജെപി കല്ല്യാശ്ശേരി മണ്ഡലം കമ്മറ്റി പ്രസ്താവനയില്‍ ആവശ്യപ്പെട്ടു.
ബിജെപി കല്ല്യാശ്ശേരി മണ്ഡലം പ്രസിഡണ്ട് കെ.വിജയന്‍, ജനറല്‍ സെക്രട്ടറി സജീവന്‍ വെങ്ങര, കര്‍ഷക മോര്‍ച്ച ജില്ലാ വൈസ് പ്രസിഡണ്ട് എം.ബാലകൃഷ്ണന്‍ എന്നിവര്‍ അക്രമം നടന്ന സ്ഥലം സന്ദര്‍ശിച്ചു.
