പഴയങ്ങാടി: ഉത്തരമലബാറില്‍ വിനോദസഞ്ചാര മേഖലയ്‌ക്കുള്ള സാധ്യതകളുടെ 10 ശതമാനം പോലും ഉപയോഗപ്പെടുത്താന്‍ ഇതുവരെ സാധിച്ചിട്ടില്ലെന്നും ആ പോരായ്‌മ നികത്തുന്നതിന് മുഖ്യമന്ത്രി പിണറായി വിജയന്റെ നേതൃത്വത്തിലുള്ള സംസ്ഥാന സര്‍ക്കാര്‍ സമഗ്ര പദ്ധതി ആവിഷ്‌ക്കരിച്ചതായും ടൂറിസം വകുപ്പ് മന്ത്രി കടകംപള്ളി സുരേന്ദ്രന്‍. പഴയങ്ങാടി റിവര്‍വ്യൂ പാര്‍ക്കിന്റെയും മംഗലശ്ശേരി ബോട്ട് റേസ് പവലിയന്റെയും പ്രവൃത്തി ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം.
ഇതിന്റെ ഭാഗമായി കണ്ണൂര്‍ ജില്ലയ്‌ക്കു മാത്രം 31.5 കോടി രൂപയുടെ വിവിധ ടൂറിസം പദ്ധതികള്‍ക്ക് ഭരണാനുമതി നല്‍കിക്കഴിഞ്ഞു. രണ്ട് കോടിയുടെ പുരുളിമല ഇക്കോ ടൂറിസം പദ്ധതി, ഒരു കോടിയുടെ പയ്യന്നൂര്‍ ബാക്ക് വാട്ടര്‍ ടൂറിസം പദ്ധതി, നാലു കോടിയുടെ പയ്യന്നൂര്‍ ഹെറിറ്റേജ് ടൂറിസം പദ്ധതി, ഒരു കോടിയുടെ വെള്ളിക്കീല്‍ മലബാര്‍ മാംഗ്രോവ്‌സ് ഇക്കോ ടൂറിസം പദ്ധതിയുടെ ആദ്യഘട്ടം, 4.88 കോടിയുടെ പറശ്ശിനിക്കടവ് ബോട്ട് ടെര്‍മിനല്‍, മൂന്നു കോടിയുടെ പഴയങ്ങാടി ബോട്ട് ടെര്‍മിനല്‍, മൂന്നര കോടിയുടെ പയ്യാമ്പലം ബീച്ച് മോടി പിടിപ്പിക്കല്‍, 7.27 കോടിയുടെ തലശ്ശേരിയിലെ വിവിധ പൈതൃക ടൂറിസം പദ്ധതികള്‍ തുടങ്ങിയവ ഇതില്‍പ്പെടും. ഈ പദ്ധതികള്‍ നടപ്പിലാവുന്നതോടെ ടൂറിസ്റ്റ് ഭൂപടത്തില്‍ ശ്രദ്ധേയമായ നേട്ടം കൈവരിക്കാന്‍ ജില്ലയ്‌ക്ക് സാധിക്കുമെന്ന് അദ്ദേഹം പറഞ്ഞു.
വിദേശികളും സ്വദേശികളുമായ കുറേയാളുകള്‍ ഇവിടത്തെ ടൂറിസ്റ്റ് കേന്ദ്രങ്ങള്‍ സന്ദര്‍ശിച്ചുപോവുന്നുവെന്നതിലപ്പുറം പ്രദേശത്തിന്റെ സാമ്പത്തികമായ വളര്‍ച്ചയും തൊഴില്‍ സാധ്യതയും കൂടി ലക്ഷ്യമിട്ടുകൊണ്ടുള്ള പദ്ധതികളാണ് ജില്ലയില്‍ ആവിഷ്‌ക്കരിക്കുന്നതെന്ന് അദ്ദേഹം പറഞ്ഞു.
പഴയങ്ങാടിയില്‍ നടന്ന ചടങ്ങില്‍ ടി.വി.രാജേഷ് എംഎല്‍എ അധ്യക്ഷത വഹിച്ചു. കണ്ടല്‍ക്കാടുകള്‍ ഉള്‍പ്പെടെ ജില്ലയുടെ പരിസ്ഥിതിക്കും പ്രകൃതി ഭംഗിക്കും ഒരു കോട്ടവും തട്ടാത്തവിധത്തിലായിരിക്കും വിനോദ സഞ്ചാര പദ്ധതികള്‍ നടപ്പിലാക്കുകയെന്ന് അദ്ദേഹം പറഞ്ഞു.
ഏഴോം പഞ്ചായത്ത് പ്രസിഡന്റ് ഡി.വിമല, പട്ടുവം പഞ്ചായത്ത് പ്രസിഡന്റ് ആനക്കീല്‍ ചന്ദ്രന്‍ എന്നിവര്‍ക്ക് നല്‍കി മന്ത്രി പ്രൊജക്ട് റിപ്പോര്‍ട്ടുകള്‍ പ്രകാശനം ചെയ്തു. കല്യാശ്ശേരി ബ്ലോക്ക് പഞ്ചായത്ത് പ്രസിഡന്റ് വി.വി.പ്രീത, മാടായി പഞ്ചായത്ത് പ്രസിഡന്റ് എസ്.കെ.ആബിദ, മറ്റു ജനപ്രതിനിധികള്‍, പാര്‍ട്ടി പ്രതിനിധികള്‍, ഡി.ടി.പി.സി സെക്രട്ടറി ഡി.ഗിരീഷ് കുമാര്‍ തുടങ്ങിയവര്‍ സംസാരിച്ചു.
ബോട്ട് ജെട്ടി, നടപ്പാത, കൈവരികള്‍, ഇരിപ്പിടം, പവലിയന്‍, റെയിന്‍ ഷെല്‍ട്ടര്‍ തുടങ്ങിയ ഉള്‍പ്പെട്ടതാണ് 90 ലക്ഷത്തിന്റെ റിവര്‍വ്യൂ പാര്‍ക്ക്. 68.4 ലക്ഷത്തിന്റെതാണ് പട്ടുവം പഞ്ചായത്തിലെ മംഗലശ്ശേരിയില്‍ നിര്‍മിക്കുന്ന ബോട്ട് റേസ് പവലിയന്‍.
കടന്നപ്പള്ളി പാണപ്പുഴ പഞ്ചായത്തിലെ വണ്ണാത്തിപ്പുഴ റിവര്‍സൈഡ് പാര്‍ക്കിന്റെ പ്രവൃത്തി ഉദ്ഘാടനവും മന്ത്രി നിര്‍വഹിച്ചു. 75 ലക്ഷം രൂപ ചെലവിലാണ് ടൂറിസം വകുപ്പ് പദ്ധതി നടപ്പിലാക്കുന്നത്. ചന്തപ്പുരയില്‍ നടന്ന ചടങ്ങില്‍ ടി.വി.രാജേഷ് എം.എല്‍.എ അധ്യക്ഷനായി. ജില്ലാ പഞ്ചായത്ത് വൈസ് പ്രസിഡന്റ് പി.പി.ദിവ്യ, പഞ്ചായത്ത് പ്രസിഡന്റ് ഇ.പി.ബാലകൃഷ്ണന്‍ തുടങ്ങിയവര്‍ സംസാരിച്ചു.
