കണ്ണൂര്: കണ്ണൂരിനെ പ്ലാസ്റ്റിക് കാരിബാഗ്-ഡിസ്പോസബ്ള് രഹിത ജില്ലയാക്കുകയെന്ന ലക്ഷ്യത്തോടെ നവംബര് ഒന്നിന് ആരംഭിച്ച പ്ലാസ്റ്റിക് രഹിത കണ്ണൂര്-നല്ല മണ്ണ് നല്ല നാട് ബോധവല്ക്കരണ കാംപയിന് കാലാവധി ഇന്ന് അവസാനിക്കും. നാളെ മുതല് അവ പൂര്ണമായി ഒഴിവാക്കിക്കൊണ്ട് മുഴുവന് ജനങ്ങളും വ്യാപാരികളും സഹകരിക്കണമെന്ന് ജില്ലാ പഞ്ചായത്ത് പ്രസിഡന്റ് കെ.വി സുമേഷ്, ജില്ലാ കലക്ടര് മീര് മുഹമ്മദലി എന്നിവര് സംയുക്ത പ്രസ്താവനയില് അഭ്യര്ത്ഥിച്ചു.
ആരോഗ്യ-പരിസ്ഥിതി സംരക്ഷണ രംഗത്ത് പുതിയ മാതൃകകള് സൃഷ്ടിച്ചുകൊണ്ടാണ് ജില്ലാ ഭരണകൂടവും കണ്ണൂര് കോര്പറേഷനും ജില്ലാ പഞ്ചായത്തും ഈ പദ്ധതിയുമായി മുന്നോട്ടുവന്നത്. ജില്ലയിലെ പുഴകളുള്പ്പെടെയുള്ള ജലസ്രോതസ്സുകളും മണ്ണും വായുവും മലിനപ്പെടുത്തുന്നതില് പ്ലാസ്റ്റിക് കാരിബാഗുകളും ഡിസ്പോസിബിള് പ്ലേറ്റുകളും കപ്പുകളുമാണ് പ്രധാന പങ്ക് വഹിക്കുന്നത് എന്ന തിരിച്ചറിവിന്റെ അടിസ്ഥാനത്തിലായിരുന്നു ഇത്. വ്യാപാരികളും ജനങ്ങളും ഉള്പ്പെടെയുള്ള പൊതു സമൂഹത്തില് നിന്ന് മികച്ച പ്രതികരണമാണ് ഇതിനകം ലഭിച്ചതെന്നും ഇരുവരും അറിയിച്ചു.
ജില്ലയിലെ കോര്പറേഷന്, മുനിസിപ്പാലിറ്റികള്, ഗ്രാമപഞ്ചായത്തുകള് ഉള്പ്പെടെ എഴുപതിലേറെ തദ്ദേശ സ്വയംഭരണ സ്ഥാപനങ്ങള് ഇതിനകം പ്ലാസ്റ്റിക് കാരിബാഗ്-ഡിസ്പോസബ്ള് വിമുക്തമായി ഔദ്യോഗിക പ്രഖ്യാപനം നടത്തിക്കഴിഞ്ഞു. ജില്ലയിലെ സര്ക്കാര് പരിപാടികളില് ഇവ ഒഴിവാക്കിക്കൊണ്ടുള്ള തീരുമാനം നേരത്തേ കൈക്കൊണ്ടിരുന്നു. കണ്ണൂരില് നടന്ന സ്കൂള് കലോല്സവം പൂര്ണമായി ഹരിതപെരുമാറ്റച്ചട്ടം പാലിച്ച് നടത്താനായത് ജില്ലയില് ആരംഭിച്ച പദ്ധതിയുടെ വിജയമായിരുന്നു.
ഹൈപ്പര്-സൂപ്പര് മാര്ക്കറ്റുകള്, ബേക്കറികള് എന്നിവയുള്പ്പെടെ ജില്ലയിലെ ചെറുതും വലുതുമായ വ്യാപാര സ്ഥാപനങ്ങളും ഇതിനകം പ്ലാസ്റ്റിക് കാരിബാഗുകള് വിതരണം ചെയ്യുന്നത് നിര്ത്തിയിട്ടുണ്ട്. പകരം തുണി സഞ്ചികളിലും പേപ്പര് കവറുകളിലുമാണ് ഇവിടങ്ങളില് സാധനങ്ങള് വിതരണം ചെയ്യുന്നത്. പ്ലാസ്റ്റിക് കാരിബാഗിനു പകരം ഉപയോഗിക്കുന്നതിനുള്ള തുണിസഞ്ചികളുടെ നിര്മാണത്തില് ജില്ല വലിയ പുരോഗതി കൈവരിച്ചിട്ടുണ്ട്. ഈയിടെ കുടുംബശ്രീയുടെ നേതൃത്വത്തില് നഗരത്തില് നടന്ന തുണി സഞ്ചി മേളയില് 80,000ത്തിലേറെ തുണി സഞ്ചികള് വിറ്റഴിക്കുകയും അഞ്ചര ലക്ഷത്തിനു മുകളില് ഓര്ഡര് ലഭിക്കുകയും ചെയ്തതായി ഇരുവരും സംയുക്ത പ്രസ്താവനയില് അറിയിച്ചു.
നാളെ മുതല് പ്ലാസ്റ്റിക് കാരിബാഗുകളും ഡിസ്പോസിബിള് സാധനങ്ങളും ജില്ലയില് വിതരണം ചെയ്യപ്പെടുന്നില്ലെന്ന് ഉറപ്പുവരുത്താന് തദ്ദേശ സ്ഥാപനങ്ങളുടെ നേതൃത്വത്തില് ശക്തമായ നടപടികള് കൈക്കൊള്ളുമെന്ന് ജില്ലാ പഞ്ചായത്ത് പ്രസിഡന്റും ജില്ലാ കലക്ടറും അറിയിച്ചു. ഭാവിയില് നമ്മുടെ ജലാശയങ്ങളും പരിസരങ്ങളും പ്ലാസ്റ്റിക് കാരിബാഗുകളാലും ഡിസ്പോസബ്ള് സാധനങ്ങളാലും മലിനമാവുന്നത് തടയാന് എല്ലാ വിഭാഗം ജനങ്ങളും ജാഗ്രതപുലര്ത്തണമെന്നും ഇരുവരും പ്രസ്താവനയില് ആവശ്യപ്പെട്ടു.
