കണ്ണൂര്‍: പിണറായി വിജയന്റെ സ്വാശ്രയ വിധേയത്വം അവസാനിപ്പിക്കുക, പരിയാരം മെഡിക്കല്‍ കോളേജ് സര്‍ക്കാര്‍ ഏറ്റെടുക്കുക, 1994 മുതലുള്ള സാമ്പത്തിക ഇടപാടുകള്‍ അന്വേഷിക്കുക എന്നീ ആവശ്യങ്ങളുന്നയിച്ച് ”രക്തസാക്ഷികളുടെ കൂത്തുപറമ്പില്‍ നിന്നും രക്തസാക്ഷിത്വം വിറ്റ പരിയാരത്തേക്ക്” എന്ന മുദ്രാവാക്യമുയര്‍ത്തി യുവമോര്‍ച്ച സംസ്ഥാന അധ്യക്ഷന്‍ കെ.പി.പ്രകാശ് ബാബു നയിക്കുന്ന പരിയാരം മോചനയാത്ര ഇന്ന് പരിയാരത്ത് സമാപിക്കും. രാവിലെ 11 മണിക്ക് കൂത്തുപറമ്പ് മാറോളിഘട്ടില്‍ നിന്നാരംഭിച്ച കാല്‍നടപ്രചാരണ യാത്ര ബിജെപി സംസ്ഥാന ജനറല്‍ സെക്രട്ടറി കെ.സുരേന്ദ്രന്‍ ഉദ്ഘാടനം ചെയ്തു. തുടര്‍ന്ന് മമ്പറം, താഴെചൊവ്വ തുടങ്ങിയ സ്ഥാലങ്ങളില്‍ ആവേശോജ്ജ്വലമായ സ്വീകരണങ്ങള്‍ക്ക് ശേഷം കണ്ണൂരില്‍ സമാപിച്ചു. സഖാക്കളുടെ രക്തസാക്ഷിത്വത്തിന് വിലയിട്ട് സ്വാശ്രയ മേഖലയില്‍ സിപിഎം നടത്തുന്ന ജനവഞ്ചന തുറന്ന് കാട്ടി യുവമോര്‍ച്ച നടത്തിയ കാല്‍ നടയാത്രക്ക് വിവിധ കേന്ദ്രങ്ങളില്‍ ആവേശോജ്ജ്വലമായ സ്വീകരണമാണ് ലഭിച്ചത്. സിപിഎം സ്വാധീന കേന്ദ്രമായ പെരളശ്ശേരി ഉള്‍പ്പടെയുള്ള പ്രദേശങ്ങളില്‍ കൊടുംവേനലിനെ വകവെക്കാതെ യാത്രക്ക് അഭിവാദ്യമര്‍പ്പിക്കാന്‍ നിരവധിപ്പേരെത്തിയിരുന്നു.
കണ്ണൂരില്‍ നടന്ന സമാപന സമ്മേളനം സംസ്ഥാന സെക്രട്ടറി വി.കെ.സജീവന്‍ ഉദ്ഘാടനം ചെയ്തു. പരിയാരം മെഡിക്കല്‍ കോളേജില്‍ നടക്കുന്നത് വഴവിട്ട നിയമനങ്ങളും അഴിമതിയും മാത്രമാണെന്ന് ഉദ്ഘാടന പ്രസംഗത്തില്‍ സജീവന്‍ പറഞ്ഞു. ഇതിനെതിരെ സമരവുമായി രംഗത്തിറങ്ങാന്‍ എസ്എഫ്‌ഐക്കോ ഡിവൈഎഫ്‌ഐക്കോ സാധിക്കില്ല. യുവമോര്‍ച്ച ശക്തമായ സമരവുമായി മുന്നോട്ട് വരുന്നത് വ്യാപകമായിക്കൊണ്ടിരിക്കുന്ന അഴിമതി തുടച്ച് നീക്കാനാണ്. അഞ്ച് സംസ്ഥാനങ്ങളില്‍ നടന്ന തെരഞ്ഞെടുപ്പ് ബിജെപിയുടെ മുത്തലാക്കാകുമെന്നാണ് സിപിഎം നേതാവ് യച്ചൂരി പറഞ്ഞത്. എന്നാല്‍ ഇരുപത് കോടിയോളം ജനങ്ങള്‍ സമ്മതിദാനാവകാശം രേഖപ്പെടുത്തിയ തെരഞ്ഞെടുപ്പില്‍ സിപിഎമ്മിന് ലഭിച്ചത് കേവലം 318 വോട്ട് മാത്രമാണ്. സിപിഎമ്മിനെ ജനങ്ങള്‍ പൂര്‍ണ്ണമായും തള്ളിയെന്നതിന് ഉദാഹരണമാണിത്. കേരളത്തില്‍ ക്രമസമാധാനം പൂര്‍ണ്ണമായും തകര്‍ന്നിരിക്കുകയാണ്. ഒരുകേസിലും നിക്ഷ്പക്ഷമായ അന്വേഷണം നടത്താനോ പ്രതികളെ അറസ്റ്റ് ചെയ്യാനോ പോലീസിന് സാധിക്കുന്നില്ല. സ്വാശ്രയ മേഖലയിലേതുള്‍പ്പടെ കേരളത്തില്‍ നടമാടുന്ന അഴിമതിക്കെതിരെ ബിജെപി ശക്തമായ സമരപരിപാടികളുമായി മുന്നോട്ട് പോകുമെന്നും സജീവന്‍ പറഞ്ഞു.
ബിജെപി സംസ്ഥാന സെല്‍ കോ-ഓഡിനേറ്റര്‍ കെ.രഞ്ജിത്ത്, ജില്ലാ അധ്യക്ഷന്‍ പി.സത്യപ്രകാശ്, യുവമോര്‍ച്ച സംസ്ഥാന ഉപാധ്യക്ഷന്‍ ബിജു ഏളക്കുഴി, സംസ്ഥാന ജനറല്‍ സെക്രട്ടറി പ്രഫുല്‍ കൃഷ്ണന്‍, ജില്ലാ അധ്യക്ഷന്‍ കെ.പി.അരുണ്‍, ലസിത പാലക്കല്‍ തുടങ്ങിയവര്‍ സംസാരിച്ചു. ഇന്ന് വൈകുന്നേരം പരിയാരം മെഡിക്കല്‍ കോളേജ് പരിസരത്ത് നടക്കുന്ന സമാപന സമ്മേളനം വൈകന്നേരം 5 മണിക്ക് ബിജെപി ദേശീയ നിര്‍വ്വാഹക സമിതിയംഗം പി.കെ.കൃഷ്ണദാസ് ഉദ്ഘാടനം ചെയ്യും.
