അമ്പലപ്പുഴ: രോഗവും ദാരിദ്ര്യവും തളര്ത്തിയ മനോഹരനും കുടുംബവും നൊമ്പര കാഴ്ചയാക്കുന്നു. പുന്നപ്ര വടക്ക് പഞ്ചായത്ത് പത്താം വാര്ഡ് കപ്പക്കട ഹുണ്ടായി ജങ്ഷന് പടിഞ്ഞാറ് ലക്ഷം വീട്ടില് മനോഹരന് (59), മകന് സൂരജ് (16), ഭാര്യാ മാതാവ് തങ്കമ്മ (80), ഭാര്യാ സഹോദരി ഗിരിജ (45) എന്നിവരാണ് നിത്യച്ചെലവിനും മരുന്നിനും വഴിയില്ലാതെ ദുരിതത്തിലായത്. ഹൃദ്രോഗിയായ മനോഹരനും ജന്മനാ കൈകാലുകള് തളര്ന്നും ബുദ്ധി വൈകല്യം ബാധിച്ച സൂരജിനും കൈത്താങ്ങാവേണ്ട മനോഹരന്റെ ഭാര്യ രാധ രണ്ട് വര്ഷം മുമ്പ് മരിച്ചു.
തലയ്ക്കുണ്ടായ അസുഖത്തെ തുടര്ന്ന് ഏറെ നാളത്തെ ചികിത്സക്കൊടുവിലാണ് രാധ ഇവരെ വിട്ടുപിരിഞ്ഞത്. മകള് സരിതയുടെ വിവാഹത്തിനും രാധയുടെ ചികില്സയ്ക്കുമായി ആകെയുണ്ടായിരുന്ന കിടപ്പാടമായ രണ്ടര സെന്റ് സ്ഥലവും വീടും വിറ്റു. പിന്നീട് കടം വാങ്ങിയും പലിശക്കെടുത്തും സമീപത്തെ വാടക വീട്ടിലാണ് ഇപ്പോള് താമസം. പറവൂര് ജങ്ഷനില് ലോഡിങ് തൊഴിലാളിയായിരുന്ന മനോഹരന് രോഗം കടുത്തതോടെ ജോലി ചെയ്യാനും കഴിയാതായി.
വാര്ദ്ധക്യസഹജമായ രോഗത്താല് വലയുന്ന ഭാര്യാ മാതാവ് തങ്കമ്മക്കും സൂരജിനും ലഭിക്കുന്ന തുച്ചമായ പെന്ഷന് തുക കൊണ്ടാണ് ഈ കുടുംബം കഴിഞ്ഞുകൂടുന്നത്. സൂരജിനെ സംരക്ഷിക്കുന്നതിന് സമൂഹ്യനീതി വകുപ്പില് നിന്ന് പ്രതിമാസം 525 രൂപ ലഭിച്ചിരുന്നെങ്കിലും രാധയുടെ മരണത്തോടെ അതും നിലച്ചു. ഇതോടെ എന്ത് ചെയ്യണമെന്നറിയാതെ പകച്ചു നില്ക്കുകയാണ് മനോഹരന്.
കാരുണ്യവതികള് തങ്ങളെ സഹായിക്കാനെത്തുമെന്ന പ്രതീക്ഷയാണ് ഇദ്ദേഹത്തിന്. ഇതിനായി എസ്ബിടി പുന്നപ്ര ശാഖയില് 67222390568 നമ്പര് അക്കാണ്ട് തുറന്നിട്ടുണ്ട്. ഐഎഫ്എസ്സി കോഡ് എസ്ബിടിആര്0000215 ഫോണ്: 9526 323750.
