പയ്യന്നൂര്‍: ചീമേനിയില്‍ പ്രവര്ത്തിക്കുന്ന കോളേജ് ഓഫ് എഞ്ചിനീയറിംഗ് തൃക്കരിപ്പൂരിലെ ഇലക്ട്രിക്കല്‍ വിഭാഗം ആതിഥ്യമരുളുന്ന ദ്വിദിന ശാസ്ത്ര സാങ്കേതിക സമ്മേളനത്തിന് പയ്യന്നൂര്‍ ഗ്രീന്‍ പാര്‍ക്ക് ഹോട്ടലില്‍ തുടക്കമായി.
പ്രിന്‍സിപ്പല്‍ ഡോ. വിനോദ് പൊട്ടകുളം ഉദ്ഘാടനം ചെയ്തു. പ്രൊഫസര്‍ ഡോ.കെ.പി മോഹന്‍ദാസ് അധ്യക്ഷത വഹിച്ചു. ഡോ.ശശിധരന്‍ ശ്രീധരന്‍, ഡോ.ശ്രീകുമാര്‍, ഡോ.എം.രഞ്ജിത്ത്, ഡോ. റീത കുഞ്ഞിമംഗലം എന്നിവര്‍ സംബന്ധിച്ചു. ഡോ. ശശിധരന്‍ ശ്രീധരന്‍ പാരമ്പര്യേതര ഊര്‍ജസ്രോതസ്സുകളുടെ കടന്നുവരവ്, ഊര്‍ജ്ജത്തിന്റെയും പവറിന്റെയും രൂപാന്തരത്തിലുള്ള ആധുനിക മാര്‍ഗങ്ങള്‍ തുടങ്ങിയ വിഷയങ്ങളെക്കുറിച്ച് സംസാരിച്ചു.
ദക്ഷിണേന്ത്യയിലെ വിവിധ എഞ്ചിനീയറിംഗ് കോളേജുകളിലെ ഗവേഷണ വിദ്യാര്‍ത്ഥിളും പ്രൊഫസര്‍മാരും അവതരിപ്പിച്ച പ്രബന്ധങ്ങളില്‍ വൈദ്യുതി ഉപയോഗിച്ച് പ്രവര്ത്തിക്കുന്ന വാഹനങ്ങളുടെ ക്ഷമത വര്‍ധിപ്പിക്കുന്നതിനുള്ള നൂതനസാങ്കേതിക മാര്‍ഗങ്ങള്‍, ഊര്‍ജ മേഖലയെ ദോഷകരമായി ബാധിക്കുന്ന പ്രശ്‌നങ്ങളും അവയുടെ പരിഹാരമാര്‍ഗങ്ങളും, വൈദ്യുതിയുടെ ഗുണനിലവാരം ഉഴര്‍ത്തുന്നതിനുള്ള മാര്‍ഗനിര്‍ദ്ദേശങ്ങളും, സൗരോര്‍ജ സാങ്കേതിക വിദ്യയിലെ പുരോഗതിക്കുപകരിക്കുന്ന പുതിയ ആശയങ്ങളുടെ സാധ്യതകളും പ്രായോഗികതയും, ഊര്‍ജോദ്പാദന കേന്ദ്രത്തിന്റെ കാര്യക്ഷമത നിര്‍ണയിക്കുന്നതിനുള്ള നൂതന മാര്‍ഗങ്ങളും ചര്‍ച്ച ചെയ്തു. സമ്മേളനം ഇന്ന് സമാപിക്കും.
