കോതമംഗലം: മാമലക്കണ്ടം ഗവ: ഹൈസ്കൂളിലെ എസ്എസ്എല്സി ഉത്തരക്കടലാസ് ഏറ്റെടുക്കാതിരുന്ന സംഭവത്തെ കുറിച്ച് വിദ്യാഭ്യാസ വകുപ്പ് അന്വേഷണം നടത്തും. മാമലക്കണ്ടം ഗവ. ഹൈസ്കൂളില് കഴിഞ്ഞദിവസം എസ്എസ്എല് സി പരീക്ഷയെഴുതിയ 17 കുട്ടികളുടെ ഉത്തരക്കടലാസ് ഏറ്റെടുക്കാന് ആളില്ലാത്തതിനാല് അദ്ധ്യാപകര് സ്കൂളില്തന്നെ വച്ച് പൂട്ടിയത്. ഇതെക്കുറിച്ചാണ് അന്വേഷണം നടത്താന് വിദ്യാഭ്യാസ വകുപ്പ് തീരുമാനിച്ചത്.
പൊതുവിദ്യാഭ്യാസ വകുപ്പ് എറണാകുളം ഡപ്യൂട്ടി ഡയറക്ടര് പി.എ. സന്തോഷിന്റെ നേതൃത്വത്തിലാണ് അന്വേഷണം. ക്ലാര്ക്കോ, സെക്യൂരിറ്റിയോ, സുരക്ഷിതമായ ഓഫീസ് മുറിയോ ഇല്ലാത്ത ഇവിടെ ഹെഡ്മാസ്റ്ററാണ് ക്ലര്ക്കിന്റെ ചുമതലകൂടി കൈകാര്യം ചെയ്യുന്നത്. ഉത്തരക്കടലാസ് അയക്കാന് പോസ്റ്റോഫീസില് ചെന്നപ്പോള് പോസ്റ്റ് മാസ്റ്റര് സ്വീകരിച്ചില്ല. അദ്ധ്യാപകര്ക്ക് എഇഒ, ഡിഇഒ എന്നിവരില്നിന്ന് കൃത്യമായ മറുപടി ലഭിച്ചില്ല. തുടര്ന്നാണ് ഉത്തരക്കടലാസ് സ്കൂളില് സൂക്ഷിക്കാന് കാരണമായതെന്നാണ് കോതമംഗലം ഡിഇഒയുടെ വിശദീകരണം. വൈകുന്നേരം കാട്ടാനശല്യം ഉള്ളതിനാലും, വാഹനസര്വ്വീസ് ഇല്ലാത്തതുംമൂലം അദ്ധ്യാപകര് ഉത്തരക്കടലാസ് സ്കൂള് ഓഫീസില് പൂട്ടി പോകുകയായിരുന്നുവെന്നാണ് വിശദീകരണം.
