ന്യൂദല്ഹി: അഹമ്മദാബാദിന് സമീപം 260 ലധികം പേരുടെ മരണത്തിന് ഇടയാക്കിയ എയര് ഇന്ത്യ വിമാനാപകടത്തെക്കുറിച്ചുള്ള കരട് അന്തിമ റിപ്പോര്ട്ട് ഒക്ടോബറോടെ തയ്യാറാകുമെന്ന് എയര്ക്രാഫ്റ്റ് ആക്സിഡന്റ് ഇന്വെസ്റ്റിഗേഷന് ബ്യൂറോ (എഎഐബി) സുപ്രീം കോടതിയെ അറിയിച്ചു.
സംഭവത്തില് സ്വതന്ത്ര ജുഡീഷ്യല് അന്വേഷണം വേണമെന്ന് ആവശ്യപ്പെട്ട് മരിച്ച പൈലറ്റ് ക്യാപ്റ്റന് സുമീത് സബര്വാളിന്റെ പിതാവ് പുഷ്കരാജ് സബര്വാളും ഫെഡറേഷന് ഓഫ് ഇന്ത്യന് പൈലറ്റ്സും സമര്പ്പിച്ച ര്ജികള് പരിഗണിക്കവെ, ബ്യൂറോ സമര്പ്പിച്ച എതിര് സത്യവാങ്മൂലത്തിലാണ് ഇക്കാര്യം വ്യക്തമാക്കിയത്.
വിമാനാപകട അന്വേഷണങ്ങളെ നിയന്ത്രിക്കുന്ന നിയമപരമായതും അന്താരാഷ്ട്രവുമായ ചട്ടക്കൂടിന് അനുസൃതമായാണ് അന്വേഷണം നടക്കുന്നതെന്ന് ബ്യൂറോ വാദിച്ചു. ഇത് വെറുമൊരു ആഭ്യന്തര അന്വേഷണമല്ലെന്നും ചിക്കാഗോ കണ്വെന്ഷനും ഐസിഎഒ അനുബന്ധം പതിമൂന്നും പ്രകാരമുള്ള അന്താരാഷ്ട്രതലത്തില് നിയന്ത്രിക്കപ്പെടുന്ന ഒരു പ്രക്രിയയാണ്. ഇത് പ്രകാരം അന്വേഷണ അധികാരം പ്രാഥമികമായും പൂര്ണ്ണമായും ബ്യൂറോയില് നിക്ഷിപ്തമാണെന്നും, സമാന്തര അന്വേഷണത്തിന് നിയമപരമായ അടിത്തറയില്ലെന്നും ബ്യൂറോ ചൂണ്ടിക്കാട്ടി.
ലണ്ടനിലേക്ക് പോയ ബോയിംഗ് 787 ഡ്രീംലൈനര് അഹമ്മദാബാദില് നിന്ന് പറന്നുയര്ന്ന് ഒരു മിനിറ്റിനുള്ളില് ബിജെ മെഡിക്കല് കോളേജ് ഹോസ്റ്റല് സമുച്ചയത്തില് ഇടിച്ചുകയറുകയായിരുന്നു. വിമാനത്തിലുണ്ടായിരുന്ന 242 പേരില് 241 പേരും ആ പ്രദേശത്തുണ്ടായിരുന്ന 19 പേരും മരിച്ചു.
ഡ്രീംലൈനര് വിമാനാപകടം: ജുഡീഷ്യല് അന്വേഷണത്തെ എതിര്ത്ത് എയര്ക്രാഫ്റ്റ് ആക്സിഡന്റ് ഇന്വെസ്റ്റിഗേഷന് ബ്യൂറോ
കരട് അന്തിമ റിപ്പോര്ട്ട് ഒക്ടോബറോടെ
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.