എരുമേലി: ഗ്രാമപഞ്ചായത്തുകളുടെ ബിപിഎല് ലിസ്റ്റില് നിന്നും അര്ഹരായ നൂറുകണക്കിന് കുടുംബങ്ങളെ ഒഴിവാക്കിയതിലൂടെ ജനവഞ്ചനയുടെയും കെടുകാര്യസ്ഥതയുടേയും ഭരണമാണ് സംസ്ഥാനത്ത് നടക്കുന്നത് ബിജെപി ജില്ലാ സെക്രട്ടറി എം.വി. ഉണ്ണികൃഷ്ണന് പറഞ്ഞു.
വിവിധ ആവശ്യങ്ങള് ഉന്നയിച്ച് ബി ജെപി എരുമേലി പഞ്ചായത്ത് കമ്മറ്റിയുടെ നേതൃത്വത്തില് നടത്തിയ സായാഹ്നധര്ണ്ണ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കഴിഞ്ഞ 9 മാസമായി പിണറായി വിജയന്റെ നേതൃത്വത്തില് നടക്കുന്ന കേരളഭരണത്തില് ജനങ്ങള്ക്ക് സുരക്ഷിതമായി ജീവിക്കാന് പോലും പറ്റാത്ത സാഹചര്യമാണുള്ളത്.പട്ടിണി പാവങ്ങളെ ഒഴിവക്കി ബിപിഎല് ലിസ്റ്റ് പണക്കാര്ക്കു വേണ്ടി മാറ്റി വച്ച സംഭവമാണ് സംസ്ഥാനത്ത് നടന്നുകൊണ്ടിരിക്കുന്നതെന്നും അദ്ദേഹം പറഞ്ഞു.
ബിപിഎല് ലിസ്റ്റിലെ അപാകത പുന:പരിശോധിക്കുക, കുടിവെള്ളക്ഷാമം പരിഹരിക്കുന്നതിന് എരുമേലി കുടിവെള്ള പദ്ധതി പൂര്ത്തീകരിക്കുക, ശബരിമല തീര്ത്ഥാടന കേന്ദ്രം കൂടിയായ എരുമേലിയിലെ വികസന പ്രവര്ത്തനങ്ങളിലെ സ്തംഭനാവസ്ഥയ്ക്ക് പരിഹാരം കാണമെന്നും അദ്ദേഹം ആവശ്യപ്പെട്ടു.
പൂഞ്ഞാര് നിയോജക മണ്ഡലം പ്രസിഡന്റ് വി.സി അജികുമാര്, ജനറല് സെക്രട്ടറി കെ.ബി. മധു, ജില്ലാ കമ്മറ്റിയംഗം അനിയന് എരുമേലി, ഈസ്റ്റ് – വെസ്റ്റ് പഞ്ചായത്ത് കമ്മറ്റി പ്രസിഡന്റുമാരായ ഹരികൃഷ്ണന് കനകപ്പലം, സന്തോഷ് പാലമൂട്ടില്, ഗ്രാമ പഞ്ചായത്തംഗം രജനീചന്ദ്രശേഖരന്, കെ.എസ്. അജയകുമാര്, രാജേഷ് കൊടിത്തോട്ടം തുടങ്ങിയവര് പ്രസംഗിച്ചു.
