തൊടുപുഴ : തൊടുപുഴ നഗരസഭ അഞ്ചാം വാര്ഡില് ഷാപ്പുംപടി ഭാഗത്തുള്ള നെല്പ്പാടത്തോട് ചേര്ന്നുള്ള സര്ക്കാര് ഭൂമിയും തോടും കയ്യേറിയും നെല്പാടം നികത്തിയും കെട്ടിടം നിര്മ്മിക്കാന് അനുമതി നല്കിയ നഗരസഭ, റവന്യൂ അധികൃതരുടെ നടപടികളെക്കുറിച്ച് അന്വേഷിച്ച് ആവശ്യമായ നടപടി സ്വീകരിക്കുവാന് മുഖ്യമന്ത്രി ഇടുക്കി ജില്ലാകളക്ടര്ക്ക് നിര്ദ്ദേശം നല്കി. നഗരസഭ അഴിമതിയിലൂടെ അനുവാദം നല്കിയ വെങ്ങല്ലൂരിലെ അനധികൃത കെട്ടിടനിര്മ്മാണം സംബന്ധിച്ച് പ്രകൃതി സംരക്ഷണ വേദി തൊടുപുഴ താലൂക്ക് കണ്വീനര് കെ.ആര്. അശോക് കുമാര് മുഖ്യമന്ത്രിക്ക് നല്കിയ പരാതിയിലാണ് നടപടി. പ്രകൃതി സംരക്ഷണ വേദി മുഖ്യമന്ത്രിക്ക് നല്കിയ പരാതി സ്വീകരിച്ചിട്ടുണ്ടന്നും പരിശോധിച്ച് ആവശ്യമായ നടപടികള് സ്വീകരിക്കുവാന് ജില്ലാകളക്ടര്ക്ക് നിര്ദ്ദേശം നല്കിയിട്ടുണ്ടന്നും കാണിച്ച് മുഖ്യമന്ത്രിയുടെ ഓഫീസിലെ സ്പെഷ്യല് ഓഫീസര് എം. ശിവശങ്കര് ഐഎഎസ് ആണ് പരാതിക്കാരനെ വിവരം അറിയിച്ചത്. മുഖ്യമന്ത്രിക്കു പുറമെ തദ്ദേശസ്വയം ഭരണസ്ഥാപനങ്ങള്ക്കുവേണ്ടിയുള്ള ഓംബുഡ്സ്മാന്, വിജിലന്സ് ഡയറക്ടര് എന്നിവര്ക്കും പ്രകൃതി സംരക്ഷണ വേദി പരാതി നല്കിയിട്ടുണ്ട്.
ഭൂമി കയ്യേറ്റത്തിനെതിരെ ഹൈക്കോടതിയില് കേസ് നിലനില്ക്കുകയാണ്.
