കൊട്ടാരക്കര: മൈലം പഞ്ചായാത്ത് ഓഫീസിന് മുന്നില് ബിജെപി നടത്തിവരുന്ന നിരാഹാരസമരം പതിനൊന്നാം ദിവസം ഒത്തുതീര്ന്നു. പഞ്ചായത്ത് ഡപ്യൂട്ടി ഡയറക്ടര് സ്ഥലത്തെത്തി നടത്തിയ ചര്ച്ചയെ തുടര്ന്നാണ് സമരം പിന്വലിച്ചത്. സേവിങ്സ് ഫണ്ടില് നിന്ന് ഈ സാമ്പത്തികവര്ഷത്തെ പദ്ധതി വിഹിതമായി ഏഴ്ലക്ഷം രൂപ നല്കാമെന്ന ഉറപ്പിലാണ് സമരം അവസാനിപ്പിച്ചത്. ടെന്ഡര് വര്ക്കിലെ സേവിങ് ബാലന്സില് നിന്നാണ് തുക നല്കുന്നത്. മാര്ച്ച് 10നകം തന്നെ പദ്ധതി തയ്യാറാക്കി തുക വിനിയോഗിക്കും.
ഇന്നലെ ഉച്ചക്ക് ഒന്നിന് തുടങ്ങി ചര്ച്ച 2.30 വരെ നീണ്ടു. ഡപ്യൂട്ടി ഡയറക്ടര് പ്രകാശിന്റെ നേതൃത്വത്തിലായിരുന്നു ചര്ച്ച. പഞ്ചായത്ത്സെക്രട്ടറി, പ്രസിഡന്റ്, ഡിഡിപി ഉദ്യോഗസ്ഥര്, പോലീസ് അധികാരികള്, ബിജെപി വാര്ഡംഗങ്ങളായ കൃഷ്ണന്കുട്ടി, ഗോപാലകൃഷ്ണന് എന്നിവര് ചര്ച്ചയില് പങ്കെടുത്തു. ഡിഡിപിയുടെ നിര്ദ്ദേശം എല്ലാവരും അംഗീകരിച്ചതോടെ സമരം അവസാനിപ്പിക്കുന്നതായി മണ്ഡലം പ്രസിഡന്റ് പ്രഖ്യാപിച്ചു. തുടര്ന്ന് ഡിഡിപി സമരപന്തലിലെത്തി ഹസ്തദാനം നല്കി മടങ്ങി.
സമരനായകന് പള്ളിക്കല് വാര്ഡംഗവും ബിജെപി മണ്ഡലം സെക്രട്ടറിയുമായ കെ.വി.സന്തോഷ്ബാബുവിന് നാരങ്ങ നീര് നല്കി മണ്ഡലം പ്രസിഡന്റ് കരീപ്ര വിജയകുമാര് സമരം അവസാനിപ്പിച്ചു. പ്രവര്ത്തകര് ആഹ്ലാദം പ്രകടിപ്പിച്ച് മൈലത്ത് പ്രകടനവും നടത്തി.
മൈലം പഞ്ചായത്തില് ഈ വര്ഷത്തേക്ക് 82,43,910 രൂപയുടെ പദ്ധതി വിഹിതം തയ്യാറാക്കിയതില് ഒരുരൂപ പോലും ബിജെപി അംഗങ്ങള് പ്രതിനിധാനം ചെയ്യുന്ന മൂന്ന് വാര്ഡുകള്ക്കും വേണ്ടി നീക്കിവച്ചിരുന്നില്ല. പരാതി പറഞ്ഞ് പരിഹാരം ഇല്ലാത്തതില് പ്രതിഷേധിച്ച് പഞ്ചായത്ത് സെക്രട്ടറിയെ മണിക്കൂറുകളോളം ഉപരോധിച്ചിരുന്നു. തുടര്ന്നും വിഷയം പരിഹരിക്കാത്തതിനാലാണ് 24 മണിക്കൂര് പ്രഖ്യാപിച്ച ഉപവാസമരം അനിശ്ചിതകാലത്തേക്ക് മാറ്റിയത്. മുട്ടമ്പലം വാര്ഡംഗമായ ഗോപാലകൃഷ്ണനാണ് ആദ്യം സമരം തുടങ്ങിയത്.
ഏഴാംദിവസം ഗോപാലകൃഷ്ണനെ അറസ്റ്റ് ചെയ്ത് ആശുപത്രിയിലേക്ക് ആശുപത്രിയിലേക്ക് മാറ്റിയതിനെ തുടര്ന്നാണ് സന്തോഷ്ബാബു സമരം തുടങ്ങിയത്.
സമരത്തിന് പഞ്ചായത്ത് ഇന്ചാര്ജ് ഷാലു കുളക്കട, പ്രസിഡന്റ് കൃഷ്ണന്കുട്ടി, ജനറല്സെക്രട്ടറി അന്തമണ് രാജേഷ്, സെക്രട്ടറിമാരായ സുനില് പള്ളിക്കല്, അനില് കൈപ്പള്ളി, രാജീവ് മുട്ടമ്പലം, മഹിളാനേതാക്കളായ രാധാമണി, ഇന്ദിര, താരാസതീഷ് ബിജെപി ജില്ല നേതാക്കളായ അഡ്വ.ചന്ദ്രമോഹനന്, മൈലംകുളംഹരി, പുലമണ് ശ്രീരാജ്, അണ്ടൂര് രാധാകൃഷ്ണന്, യുവമോര്ച്ച മണ്ഡലം ജനറല്സെക്രട്ടറി അഖില് കോട്ടാത്തല, കര്ഷകമോര്ച്ച പ്രസിഡന്റ് ചാലൂക്കോണം അജിത്ത് എന്നിവര് നേതൃത്വം നല്കി.
