കണ്ണൂര്: സിപിഎം നിയന്ത്രണത്തിലുളള കണ്ണൂര് അഴീക്കല് പാമ്പാടി ആലിന്കീഴില് ക്ഷേത്രോത്സവവുമായി ബന്ധപ്പെട്ട് നിലനില്ക്കുന്ന അയിത്താചരണ വിഷയത്തില് പ്രതികരിക്കാതെ ക്ഷേത്രക്കമ്മറ്റി നിലപാടിനെ ന്യായീകരിച്ച സിപിഎം ജില്ലാ സെക്രട്ടറി പി.ജയരാജന്റെ നടപടി പാര്ട്ടിയുടെ തനിനിറം പുറംലോകമറിഞ്ഞ ജാള്യത മറക്കാനുളള പാഴ്ശ്രമമാണെന്ന് ജെആര്എസ് സംസ്ഥാന ജനറല് സെക്രട്ടറി തെക്കന് സുനില്കുമാര് വാര്ത്താ സമ്മേളനത്തില് പറഞ്ഞു. സമരത്തില് ഒരിടത്തും ഒരിക്കലും ക്ഷേത്രകാര്യങ്ങളില് അയിത്തമുണ്ടെന്ന് ജനാധിപത്യ രാഷ്ട്രീയ സഭ പറഞ്ഞിട്ടില്ല. ക്ഷേത്രോത്സവത്തിന്റെ ഭാഗമായുളള തിരുവായുധം എഴുന്നളളത്ത് എന്ന ചടങ്ങില് പ്രദേശത്തെ പുലയ സമുദായ വീടുകള് മാറ്റി നിര്ത്തുന്നുവെന്ന് മാത്രമാണ് ചൂണ്ടിക്കാട്ടിയത്.
വര്ഷത്തിലൊരിക്കല് ദേവീഭക്തരെ വീടുകളില് ചെന്ന് അനുഗ്രഹിക്കുന്ന ചടങ്ങില് പ്രദേശ വാസികളായ ദളിത് സമുദായത്തിന് ആത്മീയ അയിത്തം കല്പിച്ച് മാറ്റിനിര്ത്തിയിരിക്കുന്നു എന്ന കാര്യത്തില് ജയരാജന് നിലപാട് വ്യക്തമാക്കണമെന്ന് അദ്ദേഹം പറഞ്ഞു. ഈ വര്ഷം ക്ഷേത്രോത്സവത്തോടനുബന്ധിച്ചുളള തിരുവായുധം എഴുന്നളളത്തിന് വിചിത്രമായ ജാതി കാര്ഡ് ഏര്പ്പെടുത്തിയ ക്ഷേത്രക്കമ്മറ്റി നടപടിക്ക് ജയരാജന് മറുപടി പറയണം. സിപിഎം പ്രാദേശിക നേതാക്കള് ഭരിക്കുന്ന ക്ഷേത്രത്തില് തിരുവായുധം എഴുന്നളളത്ത് വരുന്ന വീടുകള്ക്ക് രണ്ടുതരം നിറത്തിലുളള കാര്ഡുകളാണ് ക്ഷേത്രസമിതി ഏര്പ്പെടുത്തിയത്. ഈ കാര്ഡ് കാണിച്ചാല് ആ വീടുകളില് മാത്രമെ കോമരം കയറുകയുളളൂ. പ്രദേശത്തെ പുലയന് സമുദായത്തിന് കാര്ഡ് നിഷേധിക്കുകയും ചെയ്തു. നാളിതുവരെ മറ്റെവിടേയും കേട്ടുകേള്വിയില്ലാത്തതരം വിചിത്രമായ ജാതീയ വേര്തിരിവിന് ജയരാജന്റെ പാര്ട്ടി നേതൃത്വം കൊടുത്തിരിക്കുകയാണ്. അഴീക്കല് പ്രദേശത്ത് നിന്നുളള ദളിത് സമുദായങ്ങള് പാര്ട്ടി നിലപാടുകള്ക്കെതിരെ തിരിയുമെന്ന തിരിച്ചറിവില് വിറളിപൂണ്ടതു കൊണ്ട് കാര്യമില്ലെന്നും അദ്ദേഹം പറഞ്ഞു.
തീയ്യ സമുദായത്തില്പ്പെട്ടവരുടെ ഭഗവതി ക്ഷേത്രമാണിതെന്നും 1970 ന് മുന്പ് പട്ടികജാതി വിഭാഗത്തില്പ്പെട്ടവര്ക്ക് ക്ഷേത്ര കോമ്പൗണ്ടില് നിന്ന് കുറച്ചകലെയായിരുന്നു ഭഗവതിയെ ദര്ശിക്കാനുള്ള സ്ഥലം നിര്ണ്ണയിച്ചിരുന്നതെന്നും അവിടെ വെച്ച് പട്ടികജാതി വിഭാഗത്തില്പ്പെട്ടവര് അടിമപ്പണം എന്ന പേരിലാണ് നേര്ച്ച നടത്തിയിരുന്നതെന്നും പറഞ്ഞ ജയരാജന് അതിനെല്ലാം പില്ക്കാലത്ത് മാറ്റങ്ങള് വന്നിട്ടുണ്ടെന്നും പറയുന്നു. അങ്ങനെയെങ്കില് 1915 ലേതെന്ന് പറയുന്ന നിശ്ചയ രേഖയുടെ അടിസ്ഥാനത്തില് പിന്തുടരുന്നതെന്ന് അവകാശപ്പെടുന്ന തിരുവായുധ എഴുന്നളളത്തിലെ അയിത്തം അവസാനിപ്പാക്കാന് പാര്ട്ടിയുടെ കീഴിലുളള ക്ഷേത്ര ഭരണസമിതിയോട് എന്തു കൊണ്ട് ആവശ്യപ്പെടുന്നില്ലെന്നും അദ്ദേഹം പറഞ്ഞു. ജില്ലാ കലക്ടര് രണ്ട് വര്ഷം മുമ്പ് പുറത്തിറക്കിയ ഉത്തരവ് ലംഘിച്ചാണ് സിപിഎം ഭരണസമിതി ഇത്തവണ ഉത്സവവുമായി ബന്ധപ്പെട്ട അയിത്താചരണം നടത്തിയതെന്നും സുനില്കുമാര് പറഞ്ഞു. കലക്ടറുടെ ഉത്തരവ് പ്രകാരം 2015 ലും 2016 ലും തീയ്യ സമുദായക്കാരുടേതല്ലാത്ത മറ്റ് ഒരു സമുദായക്കാരുടെ വീടുകളിലും എഴുന്നളളിച്ച് പോകാറില്ലായിരുന്നു. വളപട്ടണം പോലീസ് അയിത്താചരണത്തിന്റെ പേരില് സിപിഎം ഭരണസമിതിക്കെതിരെ കേസെടുക്കുകയും ചെയ്തിരുന്നു. കലക്ടറുടെ ഉത്തരവും പോലീസ് കേസും എന്തിന്റെ പേരിലായിരുന്നുവെന്ന് ജയരാജന് വ്യക്തമാക്കണമെന്നും അദ്ദേഹം ആവശ്യപ്പെട്ടു .
വാര്ത്താ സമ്മേളനത്തില് ജെഎസ്എസ് സംസ്ഥാന ജനറല് സെക്രട്ടറി തെക്കന് സുനില്കുമാര്, ജില്ലാ പ്രസിഡണ്ട് പ്രസീത അഴീക്കോട്, മീനാക്ഷി ശശിധരന്, സനല്ജിത്ത് നുരിച്ചാടന്, ജീജ മിന്നാടന് എന്നിവര് പങ്കെടുത്തു.
