കഴക്കൂട്ടം: ജനവാസ കേന്ദ്രങ്ങളില് മദ്യശാലകള് തുടങ്ങുന്നത് ജനങ്ങളെ ബുദ്ധിമുട്ടിലാക്കുവാനുള്ള തന്ത്രത്തിന്റെ ഭാഗമാണെന്ന് ബിജെപി മുന് സംസ്ഥാന പ്രസിഡന്റ് വി. മുരളീധരന്. ബിവറേജ് ഔട്ട്ലെറ്റിനെതിരെ സമരം നടത്തുന്ന കുളത്തൂര് കല്ലിംഗലില് സമരപന്തലില് എത്തി സംസാരിക്കുകയായിരുന്നു അദ്ദേഹം. ജനവാസകേന്ദ്രങ്ങളില് ബിവറേജ് ഔട്ട് ലെറ്റുകള് തുടങ്ങുന്നത് ജനങ്ങളോടുള്ള വെല്ലുവിളി ആണ്. ജനങ്ങളുടെ വികാരം മനസ്സിലാക്കാതെ മദ്യത്തില് നിന്നുള്ള വരുമാനമാണ് സര്ക്കാര് ലക്ഷ്യം. കേരളത്തിലെ സ്ത്രീ സമൂഹം വളരെ അവബോധം ഉള്ളവരാണ് അവരെ പറ്റിച്ച് മദ്യത്തില് വരുമാനം കൂട്ടിയാല് സ്ത്രീ സമൂഹം തന്നെ ഇത്തരം സമരങ്ങള്ക്കെതിരെ മുന്നിട്ടിറങ്ങുമെന്ന് മുരളീധരന് പറഞ്ഞു. കഴിഞ്ഞ എട്ട് ദിവസമായി കുളത്തൂര് നിവാസികളുടെ നേതൃത്വത്തില് ആക്ഷന് കൗണ്സില് രൂപീകരിച്ച് ബിവറേജ് ഔട്ട്ലെറ്റിനെതിരെ സമരം നടക്കുകയാണ്. കൗണ്സിലര്മാരായ സുനിചന്ദ്രന്, നാരായണമംഗലം രാജേന്ദ്രന്, കെപിസിസി എക്സിക്യൂട്ടീവ് അംഗം ആറ്റിപ്ര അനില്, കോണ്ഗ്രസ്സ് മണ്ഡലം പ്രസിഡന്റ് അജയകുമാര്, എസ്എന്ഡിപി യോഗം പ്രസിഡന്റ് അരവിന്ദാക്ഷന്, ഹിന്ദുഐക്യവേദി താലൂക്ക് പ്രസിഡന്റ് മോഹനന് നായര്, ബിജെപി മണ്ഡലം കമ്മറ്റി അംഗം ശങ്കരന് കുട്ടി, വസുമതി ടീച്ചര്, ബിജെപി ആറ്റിപ്ര ഏര്യാ പ്രസിഡന്റ് ബിജു നങ്ങാണി തുടങ്ങിയവര് പങ്കെടുത്തു.
