മാവേലിക്കര: സിപിഎം ജില്ലാ സെക്രട്ടറിയേറ്റംഗമായ കെ. രാഘവന് പാര്ട്ടി ചുമതലയോ തിരുവിതാംകൂര് ദേവസ്വം ബോര്ഡ് മെമ്പര് സ്ഥാനമോ രാജിവയ്ക്കണമെന്ന് ആവശ്യം ഉയരുന്നു.
രണ്ടു സ്ഥാനം ഒരാള്ക്ക് വഹിക്കാന് സാധിക്കില്ലെന്നതാണ് പാര്ട്ടി ചട്ടം. അതിനാല് കെ. രാഘവന് ഒരു സ്ഥാനം ഒഴിയണമെന്ന ആവശ്യം എതിര് വിഭാഗം ഉന്നയിച്ചു കഴിഞ്ഞു. ജില്ലാ സെക്രട്ടറിയേറ്റംഗം എന്ന പദവി ഒഴിയണമെന്നാണ് ഇവര് ആവശ്യപ്പെടുന്നത്.
എന്നാല് അടുത്ത നിയമസഭാ തെരഞ്ഞെടുപ്പില് സ്ഥാനാര്ത്ഥിയാകാന് ഇപ്പോഴെ കച്ചമുറുക്കിയ രാഘവന് ഇതിനു തയ്യാറാകില്ലെന്നാണ് സൂചന. പാര്ട്ടി ജില്ലാ സെക്രട്ടറിയേറ്റില് നിന്നും ഒഴിവായാല് പിന്നീട് തിരികെ എത്തുക ശ്രമകരമാണെന്ന് രാഘവന് അറിയാം. കഴിഞ്ഞ തെരഞ്ഞെടുപ്പില് രാഘവന്റെ പേരുമാത്രമാണ് ജില്ലാ കമ്മറ്റി സംസ്ഥാന കമ്മറ്റിക്ക് അയച്ചത്. എന്നാല് സംസ്ഥാന തലത്തില് ഇതു വെട്ടി. അടുത്ത തവണ ഇത് ഒഴിവാക്കാന് പാര്ട്ടിയില് പിടിമുറുക്കാനാണ് രാഘവന്റെ നീക്കം.
ആര്. രാജേഷ് എംഎല്എ നിഷ്പ്രഭനാക്കി ‘സൂപ്പര് എംഎല്എ’ ആകാനും രാഘവന് ശ്രമിക്കുന്നു. മന്ത്രിതലത്തില് അടക്കം എന്തെങ്കിലും കാര്യം സാധിക്കണമെങ്കില് രാഘവനെ കാണണമെന്ന സ്ഥിതിയാണ് നിയോജക മണ്ഡലത്തിലുള്ളത്.
പാര്ട്ടി ജില്ലാ സെക്രട്ടറിയേറ്റംഗം എന്ന പദവി ഒഴിഞ്ഞാല് സംഘടനാ തലത്തില് പിടിയില്ലാതാകും. ഇതൊഴിവാക്കാന് ദേവസ്വം ബോര്ഡ് മെമ്പര് സ്ഥാനം രാജിവയ്ക്കാനാണ് രാഘവന്റെ നീക്കം. അതോടൊപ്പം പാര്ട്ടി ചുമതല നിലനിര്ത്താന് അധികാര കസേര ഉപേക്ഷിച്ചെന്ന വീര പരിവേഷം ലഭിക്കുകയും ചെയ്യും.
എന്നാല് ബോര്ഡ് മെമ്പര് സ്ഥാനം രാജിവക്കുന്നത് പാര്ട്ടിക്ക് ക്ഷീണമുണ്ടാക്കുമെന്നതാണ് പാര്ട്ടി വിലയിരുത്തല്. ഒത്തു തീര്പ്പെന്ന രീതിയില് ബോര്ഡ് പ്രസിഡന്റു സ്ഥാനം രാഘവന് വാഗ്ദാനം ചെയ്യാനാണ് സാദ്ധ്യത.
