കോഴിക്കോട്: ആനക്കാംപൊയില്-കള്ളാടി-മേപ്പാടി തുരങ്കപാത നിര്മാണത്തിനിടെയുണ്ടായ അപകടം അതീവദു:ഖകരമെന്ന് കരാര് കമ്പനിയായ ദിലീപ് ബില്ഡ്കോണ് ലിമിറ്റഡ്. ദുരന്തത്തിന്റെ ഇരകളെയും അവരുടെ കുടുംബാംഗങ്ങളെയും ചേര്ത്തുപിടിക്കും. ബോംബെ, നാഷണല് സ്റ്റോക്ക് എക്സ്ചേഞ്ചുകള്ക്ക് നല്കിയ നിയമപ്രകാരമുള്ള കത്തില് കമ്പനി അറിയിച്ചു. പ്രദേശത്ത് തുടര്ന്നു കൊണ്ടിരിക്കുന്ന രക്ഷാപ്രവര്ത്തനങ്ങള്ക്കും ദുരിതാശ്വാസ പ്രവര്ത്തനങ്ങള്ക്കും പൂര്ണ പിന്തുണ നല്കുന്നതിനാണ് ഇപ്പോള് പ്രഥമ പരിഗണന നല്കുന്നതെന്ന് കമ്പനിക്ക് വേണ്ടി സെക്രട്ടറി അഭിഷേക് ശ്രീവാസ്തവ നല്കിയ കത്തില് പറയുന്നു.
ജില്ലാ ഭരണകൂടം, അടിയന്തര ദുരന്തനിവാരണ ഏജന്സികള്, മറ്റ് ബന്ധപ്പെട്ട അധികാരികള് എന്നിവരുമായി തങ്ങള് പൂര്ണമായി സഹകരിക്കുന്നു. പദ്ധതി പ്രദേശത്തുണ്ടായിരുന്ന ജീവനക്കാരെ കണ്ടെത്തുന്നതിനും അവരുടെ വിവരങ്ങള് ശേഖരിക്കുന്നതിനുമുള്ള പ്രവര്ത്തനങ്ങളില് സഹായിക്കുന്നു. ബാധകമായ എല്ലാ എഞ്ചിനീയറിംഗ് സുരക്ഷാ, പരിസ്ഥിതി അനുമതികളും മാനദണ്ഡങ്ങളും കര്ശനമായി പാലിച്ചാണ് ഈ പദ്ധതി നടപ്പിലാക്കുന്നത്. പാരിസ്ഥിതികമായി അതീവ ദുര്ബല പ്രദേശമായതിനാല്, സുപ്രീം കോടതി നിയോഗിച്ച സെന്ട്രല് എംപവേര്ഡ് കമ്മിറ്റിയുടെ മേല്നോട്ടം ഉള്പ്പെടെയുള്ള ഒന്നിലധികം നിയന്ത്രണ സംവിധാനങ്ങള്ക്കും നിരീക്ഷണങ്ങള്ക്കും ഈ പദ്ധതി വിധേയമാണ്. ഇവിടെ നിന്നും ഖനനം ചെയ്യുന്ന എല്ലാ വസ്തുക്കളും അംഗീകൃത മാനദണ്ഡങ്ങള് പ്രകാരമാണ് കൈകാര്യം ചെയ്യുന്നത്. ഇത്തരം നിയമപാലന നടപടിക്രമങ്ങള് ഉള്ളതിനാല് ഈ പദ്ധതിയില് സാങ്കേതിക പിഴവുകള്ക്കുള്ള സാധ്യത വളരെ കുറവാണെന്ന് കമ്പനി പറയുന്നു.
അന്വേഷണവുമായി പൂര്ണമായി സഹകരിക്കാന് തങ്ങള് പ്രതിജ്ഞാബദ്ധരാണ്. കൂടുതല് വിവരങ്ങള് ലഭ്യമാകുന്ന മുറയ്ക്ക് അത് ഔദ്യോഗികമായി അറിയിക്കും.ദുരന്തബാധിത കുടുംബങ്ങളെ പിന്തുണയ്ക്കുന്നതിലും ഈ വിഷമഘട്ടത്തില് അവര്ക്കൊപ്പം നില്ക്കുന്നതിലുമാണ് തങ്ങളുടെ ശ്രദ്ധ.
