കൊച്ചി: ജില്ലാ സബ്ജൂനിയര്, ജൂനിയര് ഹോക്കി ചാമ്പ്യന്ഷിപ്പ് സമാപിച്ചു. സബ് ജൂനിയര് പെണ്വിഭാഗത്തില് നിയോണ് ലൈറ്റ് സ്പോര്ട്ടിങ് ക്ലബ്ബും ജൂനിയറില് എളമക്കര സര്ക്കാര് എച്ച്എസ്എസും കിരീടം നേടി. ലീഗ് അടിസ്ഥാനത്തില് നടത്തിയ ചാമ്പ്യന്ഷിപ്പില് ആല്ബര്ട്ട്സ് സ്പോര്ട്ടിങ് ക്ലബ്ബും നിയോണ്ലൈറ്റ് സ്പോര്ട്ടിങ് ക്ലബ്ബും റണ്ണേഴ്സ് അപായി.
ലീഗ് ജേതാക്കളെ കണ്ടെത്താനുള്ള സബ്ജൂനിയര് ആണ്വിഭാഗം കലാശ കളിയില് എറണാകുളം സ്പോര്ട്ടിങ് ക്ലബ്ബ് എതിരില്ലാത്ത രണ്ടു ഗോളുകള്ക്ക് സാന്ജോസ് ഹോക്കി ക്ലബ്ബിനെ പരാജയപ്പെടുത്തി. ജൂനിയര് വിഭാഗത്തില് എസ്.ആര്.എം സ്പോര്ട്സ് ആന്റ് ആര്ട്സ് ക്ലബ്ബിനെ ഏകപക്ഷീയമായ ഒരു ഗോളിന് തോല്പിച്ച് മിലന് സ്പോര്ട്ടിങ് ക്ലബ്ബും കിരീടം ചൂടി. യഥാക്രമം ആല്ബര്ട്ട്സും ഇമ്മട്ടി ഹോക്കി അക്കാദമിയും മൂന്നാം സ്ഥാനക്കാരായി. വിജയികള്ക്ക് ഹോക്കി ഇന്ത്യ പ്രസിഡന്റ് മറിയാമ്മ കോശി, ഹൈബി ഈഡന് എം.എല്.എ, കൗണ്സിലര് ബീന മഹേഷ് എന്നിവര് ട്രോഫികള് സമ്മാനിച്ചു.
