കോട്ടയം: കേരളത്തില്‍ നടമാടുന്നത് കമ്മ്യൂണിസ്റ്റുകാരന്റെ മാടമ്പി ഭരണമാണെന്ന് ബിജെപി സംസ്ഥാന ജനറല്‍ സെക്രട്ടറി എ.എന്‍. രാധാകൃഷ്ണന്‍. മാര്‍ക്‌സിസ്റ്റ് അക്രമവിരുദ്ധ ജനകീയ സമിതിയുടെ നേതൃത്വത്തില്‍ കോട്ടയത്ത് നടന്ന ജനകീയ ധര്‍ണ്ണ ഉദ്ഘാടനം ചെയ്യുകയായിരുന്നു അദ്ദേഹം. അക്രമങ്ങളുടെ തേര്‍വാഴ്ചയും ജനാധിപത്യ ധ്വംസനവും ഭരണകൂട ഭീകരതയും ഒത്തുചേര്‍ന്ന് സംസ്ഥാനം അരാജകത്വത്തിലാണ്. ആശയവൈരുദ്ധ്യം പ്രകടപ്പിക്കുന്നവരെ ശാരീരികമായി ഉന്മൂലനം ചെയ്യുന്ന നയമാണ് ഇവര്‍ നടത്തിവരുന്നത്. സിപിഎമ്മിനുള്ളിലെ വിഭാഗീയതയും ഭരണപരാജയവും മറച്ച് വയ്‌ക്കാനാണ് ഇവര്‍ എതിരാളികള്‍ക്കെതിരെ ആയുധമെടുക്കുന്നത്. പാര്‍ട്ടിയില്‍ വിഭാഗീയത ഏറെയുള്ള പിണറായി വിജയന്റെയും വിഎസ്സിന്റെയും മണ്ഡലങ്ങളിലാണ് അക്രമങ്ങള്‍ കൂടുതലായി അരങ്ങേറുന്നത്. മുഖ്യമന്ത്രി പദം അലങ്കരിക്കുന്ന പിണറായി വിജയന്‍ പാര്‍ട്ടി സെക്രട്ടറിയിലേക്ക് തരംതാഴുന്നു. അക്രമങ്ങളില്‍ കൊലചെയ്യപ്പെടുന്നവരുടെ കുടുംബത്തെ സമാശ്വസിപ്പിക്കാന്‍ പോലും അദ്ദേഹം തയ്യാറാവുന്നില്ല. ക്രമസമാധാന തകര്‍ച്ചമൂലം ദുരിതത്തിലായ ജനതയ്‌ക്ക് റേഷന്‍നല്‍കാതെ അന്നം മുട്ടിക്കുന്ന നടപടിയാണ് സര്‍ക്കാരിന്റേത്. കിണറുകളില്‍ ബാര്‍ബര്‍ഷാപ്പുകളിലെ മുടികള്‍ കൊണ്ടിട്ട് എതിരാളികളുടെ കുടിവെള്ളം മുട്ടിക്കുകയാണ് പാര്‍ട്ടിപ്രവര്‍ത്തകര്‍. സ്വന്തം മണ്ഡലത്തില്‍ മാത്രം മൂന്ന് കൊലപാതകങ്ങള്‍ അരങ്ങേറിയപ്പോഴും മുഖ്യമന്ത്രി മൗനം ഭജിക്കുകയാണ്. ടി.പി. ശ്രീനിവാസന്‍, എം.വി. ദേവന്‍, സി.ആര്‍.നീലകണ്ഠന്‍, ഹൈക്കോടതി ജഡ്ജിമാര്‍ തുടങ്ങി സമൂഹത്തിലെ ഉന്നതന്മാര്‍വരെ കമ്മ്യൂണിസ്റ്റുകാരുടെ പീഡനത്തിന് ഇരയാകുന്നു. കോളേജ് പ്രിന്‍സിപ്പല്‍മാരുടെ കുഴിമാടം തീര്‍ത്തും കസേരകത്തിച്ചും പട്ടികജാതി വിഭാഗങ്ങളെ അധിക്ഷേപിക്കുന്നു. ഇതിനെല്ലാം അറുതിവരുത്തി സംസ്ഥാനത്ത് ക്രമസമാധാനം പുനസ്ഥാപിക്കാന്‍ സര്‍ക്കാര്‍ തയ്യാറാവണമെന്നും അദ്ദേഹം ആവശ്യപ്പെട്ടു.
ആറ് പതിറ്റാണ്ട് പിന്നിട്ട ജനാധിപത്യ കേരളത്തില്‍നിന്നും കഴിഞ്ഞ ഒമ്പത് മാസങ്ങളായി പടിയിറങ്ങിയ ജനാധിപത്യത്തെ തിരികെ പ്രതിഷ്ഠിക്കാന്‍ ജനങ്ങള്‍ കര്‍മ്മനിഷ്ഠരാവണമെന്ന് തപസ്യ സംസ്ഥാന സെക്രട്ടറി എം. സതീശ് അഭിപ്രായപ്പെട്ടു. മാര്‍ക്‌സിസ്റ്റ് അക്രമത്തില്‍ കഴിഞ്ഞ ഒമ്പത് മാസംകൊണ്ട് ഒമ്പത് ജീവനാണ് നഷ്ടപ്പെട്ടതെന്നും അദ്ദേഹം ഓര്‍മ്മിപ്പിച്ചു.
മാര്‍ക്‌സിസ്റ്റ് അക്രമവിരുദ്ധ ജനകീയസമിതി ചെയര്‍മാന്‍ എ. കേരളവര്‍മ്മ അദ്ധ്യക്ഷത വഹിച്ചു. ആര്‍എസ്എസ് പ്രാന്ത കാര്യകാരി സദസ്യന്‍ അഡ്വ. എന്‍. ശങ്കര്‍റാം, മാര്‍ക്‌സിസ്റ്റ് അക്രമവിരുദ്ധ ജനകീയസമിതി കണ്‍വീനര്‍ ഡി. ശശികുമാര്‍, ടി.എന്‍. നളിനാക്ഷന്‍, കെ.യു. ശാന്തകുമാര്‍ എന്നിവര്‍ പ്രസംഗിച്ചു.
ബിജെപി സംസ്ഥാന സഹ സംഘടനാ സെക്രട്ടറി കെ. സുഭാഷ്, ബാലഗോകുലം സംസ്ഥാന സെക്രട്ടറി സി.സി. ശെല്‍വന്‍, ബിജെപി മദ്ധ്യമേഖലാ പ്രസിഡന്റ് അഡ്വ. എന്‍.കെ. നാരായണന്‍ നമ്പൂതിരി, ജില്ലാ പ്രസിഡന്റ് എന്‍. ഹരി, ബിഎംഎസ് ജില്ലാ പ്രസിഡന്റ് വി.എസ്. പ്രസാദ്, തപസ്യ സംസ്ഥാന സെക്രട്ടറി പി.ജി. ഗോപാലകൃഷ്ണന്‍, ആര്‍എസ്എസ് വിഭാഗ് സഹ സംഘചാലക് പി.പി. ഗോപി എന്നിവര്‍ പങ്കെടുത്തു.
