നെയ്യാറ്റിന്കര: നെയ്യാറ്റിന്കര ജനറല് ആശുപത്രി സൂപ്രണ്ടിനെ ബിജെപി പ്രവര്ത്തകര് ഉപരോധിച്ചു. ആശുപത്രി സൂപ്രണ്ട് സ്റ്റാന്ലിയെയാണ് ഇന്നലെ ബിജെപി പ്രവര്ത്തകര് ഉപരോധിച്ചത്. ആശുപത്രി എച്ച്എംസി മെമ്പറും ബിജെപി മണ്ഡലം വൈസ് പ്രസിഡന്റുമായ മഞ്ചത്തല സുരേഷിന്റെ നേതൃത്വത്തിലായിരുന്നു ഉപരോധം.
വെള്ളിയാഴ്ച ജനറല് ആശുപത്രിയില് ചികിത്സക്കെത്തിയ ആര്എസ്എസ് പ്രവര്ത്തകരെയും ഡോക്ടറേയും ആശുപത്രി ജീവനക്കാരെയും മുപ്പതോളം വരുന്ന സിപിഎം ഗുണ്ടകള് വെട്ടിക്കൊലപ്പെടുത്താന് ശ്രമിക്കുകയും ആശുപത്രി ഉപകരണങ്ങള് നശിപ്പിച്ചിട്ടും അക്രമികള്ക്കെതിരെ യാതൊരു തരത്തിലുള്ള പരാതിപോലും നല്കാതെ പ്രതികളെ സംരക്ഷിക്കാന് ശ്രമിക്കുകയാണെന്ന് ആരോപിച്ചാണ് സൂപ്രണ്ടിനെ ഉപരോധിച്ചത്. മണിക്കൂറുകള് നീണ്ട ഉപരോധത്തിനൊടുവില് നെയ്യറ്റിന്കര ഡിവൈഎസ്പി ഹരികുമാര്, നഗരസഭ ചെയര്പേഴ്സണ് ഹീബ, വൈസ് ചെയര്മാന് കെ.കെ. ഷിബു തുടങ്ങിയവര് ബിജെപി പ്രവര്ത്തകരുമായി ചര്ച്ചനടത്തുകയും സൂപ്രണ്ട് പ്രതികള്ക്കെതിരെ നടപടിയെടുക്കുവാന് ഡിവൈഎസ്പി ഹരികുമാറിന് രേഖാമൂലം പരാതി കൈമാറുകയും ചെയ്തു.
തുടര്ന്ന് ഉപരോധം അവസാനിപ്പിച്ച പ്രവര്ത്തകര് നെയ്യാറ്റിന്കരയില് പ്രകടനം നടത്തുകയും ചെയ്തു. ബിജെപി നെയ്യാറ്റിന്കര നിയോജകമണ്ഡലം പ്രസിഡന്റ് സുരേഷ് തമ്പി, സംസ്ഥാന സമിതി അംഗം നടരാജന്, ജനറല് സെക്രട്ടറി അഡ്വ.പൂഴികൂന്ന് ശ്രീകുമാര്, വൈസ് പ്രസിഡന്റ് മഞ്ചത്തല സുരേഷ്, യുവമോര്ച്ച സംസ്ഥാന സമിതി അംഗം രഞ്ചിത്ത് ചന്ദ്രന്, കൗണ്സിലര്മാരായ ഹരികുമാര്, ഷിബുരാജ്കൃഷ്ണ, അരംകമുഗള് സന്തോഷ്, ആലംപൊറ്റ ശ്രീകുമാര്, കൂട്ടപ്പന മഹേഷ്, പൂതംകോട് സജി, മാമ്പഴക്കര ഗോപന്, ശ്രീലാല്, രാമേശ്വരം ഹരിതുടങ്ങിയവര് ഉപരോധത്തിനും തുടര്ന്ന് നടന്ന പ്രകടനത്തിനും നേതൃത്വം വഹിച്ചു.
