മുന്പെങ്ങുമില്ലാത്ത വിധം വരള്ച്ചയുടെ കൊടുംവറുതിയിലേക്ക് കേരളം നീങ്ങുമ്പോള്, കുടിവെള്ള ക്ഷാമത്തോടൊപ്പം കടുത്ത വൈദ്യതി പ്രതിസന്ധിയും കാത്തിരിക്കുകയാണ്. വൈദ്യുതി ഉല്പ്പാദനത്തിലെ ഗണ്യമായ കുറവും വര്ധിച്ച ഉപഭോഗവും തമ്മിലുള്ള അന്തരത്തെ മറികടക്കാന് കുറഞ്ഞ വിലയ്ക്ക് വൈദ്യുതി നല്കാമെന്ന് കേന്ദ്രം ഉറപ്പ് നല്കിയിട്ടും രാഷ്ട്രീയ തൊട്ടുകൂടായ്മയില് ഉടക്കി, സംസ്ഥാന സര്ക്കാര് മുഖം തിരിച്ചുനില്ക്കുകയാണ്.
രൂക്ഷമായ വൈദ്യുതി പ്രതിസന്ധിയെ പവര്കട്ട് ഏര്പ്പെടുത്തിയും അധികചാര്ജ് ഈടാക്കിയും മറികടക്കാമെന്നാണോ സര്ക്കാര് കരുതുന്നത്? സിപിഎമ്മിന്റെ രാഷ്ട്രീയ വൈരാഗ്യത്തിന് പൊതുജനം എന്ത് പിഴച്ചു? ജനത്തിന്റെ മേല് ഭാരം കയറ്റിവച്ചിട്ട് വേണോ രാഷ്ട്രീയക്കളി?
മനോജ് കൃഷ്ണന്,പെരുമ്പാവൂര്
‘വിധി’യുടെ വിളയാട്ട്
ഇന്നത്തെ കലാതിലകം നാളത്തെ നടന വിസ്മയമായി മാറുന്നു-കലോത്സവവേദിയില് മികച്ച പെര്ഫോര്മറായി മാറിയ മഞ്ജുവാര്യര്, നവ്യാ നായര്, കാവ്യാമാധവന്, അമ്പിളിദേവി അങ്ങനെ എത്ര നടികള് മലയാളത്തിലെ അഭ്രപാളിയെ വിസ്മയിപ്പിച്ചു. ഇന്ന് സ്കൂള് കലോത്സവ മത്സരാര്ത്ഥികളെ ചൊല്ലി മാതാ-പിതാക്കള് മത്സരിക്കുന്നു, വിധകര്ത്താക്കളുമായി കയ്യാങ്കളി നടത്തുന്നു? ഗ്രേഡിന് വേണ്ടിയുള്ള ലോബികള് വേറെയും പിടിമുറുക്കുന്നു. സിഡികള് വര്ക്ക് ചെയ്യാതെ മത്സരയിനത്തില് നിന്ന് ഔട്ടായ കുട്ടികള് ഒരു വശത്ത് ധര്മസങ്കടത്തിലും! വിധിയുടെ വിളയാട്ട് പമ്പരം കറങ്ങുന്നു. വിധി കര്ത്താക്കള്ക്ക് പ്രാക്കോട് പ്രാക്കും.
വടക്കേതില് വിനോദ് കുമാര്,നറുകര
ജെല്ലിക്കെട്ട് നിയമവിധേയമാക്കണം
തമിഴ്നാടിന്റെ കൊയ്ത്തുത്സവമായ പൊങ്കലിന്റെ ഭാഗമായി നടത്തുന്ന ജെല്ലിക്കെട്ട് നിയമവിധേയമാക്കേണ്ടതാണ്. ഇതിനെ മൃഗപീഡനമായിക്കാണാതെ മൃഗങ്ങള്ക്ക് നല്കുന്ന കായികശേഷി വര്ധനവായി കണക്കാക്കേണ്ടതാണ്. ഇത് മൃഗപീഡനമെങ്കില് കാളകളെക്കൊന്ന് ഇറച്ചി ഭക്ഷിക്കുന്നത് ക്രൂരമായ മൃഗപീഡനമല്ലേ?
കഴുതകളുടെ ചുമലില് വന്ഭാരം കയറ്റി മലമുകളിലേക്ക് യാത്ര ചെയ്യിപ്പിക്കുന്നതും, കാളകളെക്കൊണ്ട് ഭാരം കയറ്റി വണ്ടികള് വലിപ്പിക്കുന്നതും, നിലങ്ങള് ഉഴുവിക്കുന്നതും, ആനകളെക്കൊണ്ട് തടിയെടുപ്പിക്കുന്നതുമൊക്കെ മൃഗപീഡനങ്ങളല്ലേ? കുതിര പോലീസ് സേനയെ നിലനിര്ത്തുന്നതും പീഡനത്തിന്റെ നിര്വചനത്തില്പ്പെടുത്തി കുതിരപോലീസിനെ നിരോധിക്കാന് കഴിയുമോ?
പി.കെ.ശങ്കരന്കുട്ടി,തിരുവനന്തപുരം
