കോട്ടയം: സ്കൂള് കലോത്സവങ്ങളില് മാജിക് മത്സരയിനമാക്കി മാറ്റാനുള്ള സര്ക്കാര് നടപടിക്കെതിരെ ശക്തമായ പ്രതിഷേധ പരിപാടികള് സംഘടിപ്പിക്കുമെന്ന് മാജിക്കല് റിയലിസം ഭാരവാഹികള് പത്രസമ്മേളനത്തില് അറിയിച്ചു. സര്ക്കാരിന്റെ വീണ്ടുവിചാരമില്ലാത്ത തീരുമാനത്തിലൂടെ വര്ഷങ്ങളായി മാജിക് കൊണ്ട് ജീവിച്ച കലാകാരന്മാര് ആശങ്കയിലാണ്. വന്കിട ബിസിനസ് ലോബിയാണ് ഇതിനു പിന്നില് പ്രവര്ത്തിക്കുന്നത്.
രഹസ്യമാണ് മാജിക്കിന്റെ ജീവന്, സ്കൂള് വേദികളില് മാജിക് മത്സരയിനമായാല് കുട്ടികള്ക്കതിന്റെ രഹസ്യസ്വഭാവം സംരക്ഷിക്കാന് കഴിയില്ല. കലോത്സവങ്ങളില് താല്ക്കാലിക ലാഭം നേടാന് എത്തുന്നവര്ക്ക് മാജിക് എന്ന കലയോട് ഒരിക്കലും ആത്മാര്ത്ഥതയുണ്ടാകില്ല. പത്ത് വര്ഷം മുന്പ് സര്ക്കാര് ഇതെ നടപടി സ്വീകരിച്ചപ്പോള് മാന്ത്രികരുടെ ശക്തമായ പ്രതിഷേധത്തെ തുടര്ന്ന് വിദ്യാഭ്യാസ മന്ത്രി എം.എം.എ ബേബി തീരുമാനം പിന്വലിച്ചിരുന്നു. എന്നാല് ഇന്ന് സര്ക്കാര് നടപടി റദ്ദാക്കണമെന്നാവശ്യപ്പെട്ട് മുഖ്യമന്ത്രിക്ക് നിവേദനം നല്കിയിട്ടും മറുപടിയില്ലെന്നും മജീഷ്യന്മാര് ആരോപിച്ചു.പത്രസമ്മേളനത്തില് മജീഷ്യന് മനുമങ്കൊമ്പ്, ദീപു വാഴൂര്, സുനില് മാസ്മര, സുരേഷ് കല്ലട എന്നിവര് സംസാരിച്ചു.
