ചിറക്കല്‍: ആറാം കോട്ടത്ത് സിപിഎം അക്രമത്തില്‍ ആര്‍എസ്എസ് പ്രവര്‍ത്തനക് പരിക്കേറ്റു, ആറാം കോട്ടത്തെ ദാമോദരന്റെ മകന്‍ വി.കെ.വിജിത്തിനാണ്(22) പരിക്കേറ്റത്. മാരകായുധങ്ങളുമായി സംഘടിച്ചെത്തിയ സിപിഎം സംഘം നിരവധിപേര്‍ നോക്കിനില്‍ക്കേ അക്രമിക്കുകയായിരുന്നു. തലക്കും കൈകാലുകള്‍ക്കും ഗുരുതരമായി പരിക്കേറ്റ വിജിത്തിനെ കണ്ണൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു.
ബിജെപി ജില്ലാ ജനറല്‍ സെക്രട്ടറി കെ.കെ.വിനോദ് കുമാര്‍, അഴീക്കോട് മണ്ഡലം ജനറല്‍ സെക്രട്ടറി ഒ.കെ.സന്തോഷ് കുമാര്‍, ജസിന്‍ ജിഷ്ണുദാസ്, കെ.സി.ഷൈജു, പ്രിയേഷ് തുടങ്ങിയവര്‍ ആശുപത്രി സന്ദര്‍ശിച്ചു.
അഴീക്കോട് നിയോജക മണ്ഡലത്തിന്റെ വിവിധ ഭാഗങ്ങളില്‍ സിപിഎം ക്രിമിനല്‍ സംഘങ്ങള്‍ ഏകപക്ഷീയമായ അക്രമങ്ങള്‍ അഴിച്ചുവിട്ട് അരാജകത്വം സൃഷ്ടിക്കുകയാണെന്ന് ബിജെപി അഴീക്കോട് നിയോജക മണ്ഡലം ജനറല്‍ സെക്രട്ടറി ഒ.കെ.സന്തോഷ് കുമാര്‍ പ്രസ്താവനയില്‍ ആരോപിച്ചു. സമാധാനം നിലനില്‍ക്കുന്ന പ്രദേശങ്ങളില്‍ ബോധപൂര്‍വ്വം സംഘര്‍ഷം സൃഷ്ടിക്കാനുള്ള സിപിഎമ്മിന്റെ ഗൂഡനീക്കങ്ങള്‍ക്കെതിരെ സമാധാന കാംക്ഷികള്‍ ജാഗ്രത പാലിക്കണമെന്നും സന്തോഷ് കുമാര്‍ പ്രസ്താവനയില്‍ പറഞ്ഞു.
