കണ്ണൂര്: ഹരിതകേരള മിഷന് സന്ദേശപ്രചരണത്തിന്റെ ഭാഗമായി ഇന്ഫര്മേഷന് പബ്ലിക് റിലേഷന്സ് വകുപ്പ് സജ്ജമാക്കിയ ഹരിത എക്സ് പ്രസ് കലാജാഥ ജില്ലയിലെ വിവിധ കേന്ദ്രങ്ങളില് പര്യടനം നടത്തി. പട്ടുവം, ഗവ.എഞ്ചിനീയറിംഗ് കോളേജ്, മട്ടന്നൂര് ബസ് സ്റ്റാന്റ്, ഇരിട്ടിപഴയ ബസ് സ്റ്റാന്റ് എന്നിവിടങ്ങളില് ആവേശകരമായ സ്വീകരണമാണ് കലാജാഥയ്ക്ക് ലഭിച്ചത്. സ്വീകരണ കേന്ദ്രങ്ങളില് വിദ്യാര്ഥികളും ജനപ്രതിനിധികളും നാട്ടുകാരുമായി വന്ജനാവലിയാണ് എത്തിയത്. ജയചന്ദ്രന് കടമ്പനാടിന്റെ നേതൃത്വത്തിലുള്ള ഗായക സംഘം അവതരിപ്പിച്ച പ്രകൃതി സംരക്ഷണത്തെക്കുറിച്ചും കാര്ഷിക സംസ്കാരം തിരിച്ചുപിടിക്കുന്നതിനെക്കുറിച്ചുമുള്ള നാടന് പാട്ടുകള് ജനങ്ങളില് ആവേശമുണര്ത്തി. വിവിധയിടങ്ങളില് നല്കിയ സ്വീകരണത്തില് എം.എല്.എമാരായ ജെയിംസ് മാത്യു, ടി.വി ജെയിംസ്, മറ്റ് ജനപ്രതിനിധികള്, പൗരപ്രമുഖര് തുടങ്ങിയവര് പങ്കെടുത്തു.
ഡിസംബര് എട്ടിന് സംസ്ഥാന തലത്തില് വന്ജനകീയ പങ്കാളിത്തത്തോടെ തുടക്കം കുറിച്ച ഹരിത കേരളം മിഷനുമായി ബന്ധപ്പെട്ട മാതൃകാപരമായ പ്രവര്ത്തനങ്ങളുടെ ചിത്രങ്ങള്, സര്ക്കാര് പദ്ധതികളുടെ വിശദാംശങ്ങള്, മുഖ്യമന്ത്രി പിണറായി വിജയന്, ഗായകന് കെ.ജെ യേശുദാസ്, ചലച്ചിത്രതാരം മഞ്ജുവാര്യര് തുടങ്ങിയവരുടെ സന്ദേശങ്ങളടങ്ങിയ വീഡിയോ എന്നിവയുടെ പ്രദര്ശനം എന്നിവ ഉള്പ്പെട്ടതാണ് ഹരിത എക്സ്പ്രസ്. അവസാന ദിവസമായ ഇന്ന് രാവിലെ 10.30ന് പാനൂര്, വൈകീട്ട് 4.30ന് പിണറായി, 5.30ന് തലശ്ശേരി എന്നിവിടങ്ങളിലാണ് വാഹനം പര്യടനം നടത്തുക.
