കുണ്ടറ: വയലേലക്കായി സംസാരിക്കുകയും സമരം നടത്തുകയും ചെയ്ത സഖാവ് സ്വന്തം ഏലാ മണ്ണിട്ട് നികത്തുന്നു.
തൃക്കോവില്വട്ടം ഗ്രാമപഞ്ചായത്തില് കണ്ണനല്ലൂര് ഇടപ്പാംതോട് ഏലായാണ് മണ്ണിട്ട് നികത്തിയത്. ഇടപ്പാംതോട് ഏലായില് തൃക്കോവില്വട്ടം സിപിഎം നേതൃത്വത്തിലുള്ള ഭരണസമിതിയിലെ മുന് പഞ്ചായത്ത് വൈസ് പ്രസിഡന്റ് സുലൈമാന്കുഞ്ഞിന്റെ മകനായ കണ്ണനല്ലൂര് ഇഎസ്ഐ ബ്രാഞ്ച് സെക്രട്ടറിയും കോണ്ട്രാക്ടറുമായ അന്സാറിന്റെ വയലാണ് നൂറുകണക്കിന് ലോഡ് മണ്ണ് ഉപയോഗിച്ച് രാത്രിയുടെ മറവില് നികത്തിയത്.
സംഭവം ബിജെപി ഏറ്റെടുക്കുകയും വിഷയം വിവാദമാവുകയും ചെയ്തതോടെ ഇടതുമുന്നണിയിലെ ഘടകകക്ഷി പ്രവര്ത്തകരും ഈ പ്രശ്നം ഏറ്റെടുത്ത് രംഗത്തുവന്നു. ഇതിനെ തുടര്ന്ന് വില്ലേജ്, പഞ്ചായത്ത്, കൃഷി വകുപ്പ് ഉദ്യോഗസ്ഥരും, കൊട്ടിയം പോലീസും സ്ഥലത്തെത്തി. സ്ഥലത്ത് തടിച്ചുകൂടിയ ബിജെപി ഉള്പ്പെടെയുള്ള രാഷ്ട്രീയപ്രവര്ത്തകരുമായി നടത്തിയ ചര്ച്ചയില് അന്പത് സെന്റില്പരം ഉള്ള നിലത്തില് നിക്ഷേപിച്ച നൂറ് കണക്കിന് ലോഡ് മണ്ണ് ജെസിബി ഉപയോഗിച്ച് നീക്കി ഏലാ പഴയ രീതിയില് പുനസ്ഥാപിക്കാമെന്നും അതിനുവേണ്ടി വരുന്ന ചിലവ് സിപിഎം ബ്രാഞ്ച് സെക്രട്ടറി അന്സാറിന്റെ പക്കല് നിന്ന് ഈടാക്കാമെന്നുമുള്ള ഉറപ്പിലാണ് സമരം അവസാനിപ്പിച്ചത്.
