കോഴിക്കോട്: കലയുടെ രാപ്പകലുകള് സമ്മാനിക്കുന്ന റവന്യൂ ജില്ലാ സ്കൂള് കലോത്സവത്തിന് നാളെ തിരിതെളിയും. നാലു മുതല് എട്ടുവരെ വെള്ളിമാട്കുന്ന് ജെഡിടി ഇസ്ലാം ഹയര്സെക്കന്ഡറി സ്കൂളാണ് കലോത്സവത്തിന്റെ പ്രധാന വേദിയാവു ന്നത്. ജില്ലയിലെ ഏറ്റവും വലിയ കലാമേളയ്ക്കായി ഒരുക്കങ്ങള് പൂര്ത്തിയായതായി സംഘാടകസമിതി ഭാരവാഹികള് വാര്ത്താസമ്മേളനത്തില് അറിയിച്ചു.
പതിനേഴ് ഉപജില്ലകളില് നിന്നായി 8,641 മത്സരാര്ത്ഥികള് മാറ്റുരക്കും. ജില്ലാ വിദ്യാഭ്യാസ ഓഫീസര്മാര് നല്കിയ ഇരുനൂറോളം അപ്പീലുകളുമുണ്ട്. കൂടാതെ കോടതി, ബാലാവകാശ കമ്മീഷന് എന്നിവ മുഖേന എത്തുന്ന അപ്പീലുകളും കൂടിയാകുമ്പോള് സഖ്യ ഇനിയും കൂടും. 297 ഇനങ്ങളിലാണ് മത്സരം നടക്കുക. പതിനഞ്ച് വേദികളിലായാണ് മത്സരം. ജെഡിടി സ്കൂളിനെ കൂടാതെ എന്ജിഒ ക്വാട്ടേഴ്സ് എച്ച്എസ്- എച്ച്എസ്എസ്, സില്വര് ഹില്സ് സ്കൂള്, സെന്റ് ഫിലോമിന സ്കൂള്, സെന്റ് ജോസഫ് ജൂനിയര് സ്കൂള്, കൂറ്റഞ്ചേരി ശിവക്ഷേത്രം ഓപ്പണ് ഓഡിറ്റോറിയം എന്നിവിടങ്ങളിലും മത്സരങ്ങള് നടക്കും.
നാലിന് രാവിലെ 9.30ന് സ്റ്റേജിതര മത്സരങ്ങള് ആരംഭിക്കും. എന്ജിഒ ക്വാട്ടേഴ്സ് എച്ച്എസ്-എച്ച്എസ്എസ്സിലെ ഇരുപത് ക്ലാസ് മുറികളാണ് സ്റ്റേജിതര മത്സരങ്ങള് നടക്കുക.
മൂന്നിന് പകല് മൂന്നിന് ആര്ഡിഡി ജയശ്രീ രജിസ്ട്രേഷന് ഉദ്ഘാടനം ചെയ്യും. എല്ലാ ദിവസവും രാവിലെ 8.30 മുതല് വൈകീട്ട് നാല് വരെയാണ് രജിസ്ട്രേഷന്. അഞ്ചിന് വൈകീട്ട് നാലിന് കലോത്സവം മന്ത്രി എ.കെ. ശശീന്ദ്രന് ഉദ്ഘാടനം ചെയ്യും. മന്ത്രി ടി.പി. രാമകൃഷ്ണന് ബെസ്റ്റ് പിടിഎ അവാര്ഡ് വിതരണം നടത്തും. ഉദ്ഘാടന സമ്മേളനത്തിന് മുന്നോടിയായി സില്വര്ഹില്സ് സ്കൂളില് നിന്ന് ജെഡിടിയിലേക്ക് ഘോഷയാത്രയും നടക്കും.
മൈലാഞ്ചി, ഹിന്ദോളം, മോഹനം, സാവേരി, ഭൈരവി, ഭൂപാളം, കാംബോജി തുടങ്ങിയ പേരുകളിലാണ് വേദികള്. മത്സരാര്ത്ഥികളില് കൂടുതലും പെണ്കുട്ടികളാണ്.-5,219 പേര്. 3,422 ആണ്കുട്ടികളും മത്സരവേദിയിലെത്തും. യുപി വിഭാഗത്തില് 1892 കുട്ടികളും ഹൈസ്കൂള് വിഭാഗത്തില് 3780 ഉം ഹയര്സെക്കന്ഡറി വിഭാഗത്തില് 2969 ഉം പേരും മത്സരിക്കും. ഭക്ഷണത്തിന് ഡിസ്പോസിബിള് ഗ്ലാസുകളും മറ്റും ഒഴിവാക്കുമെന്നും സ്വാഗതസംഘം ഭാരവാഹികള് അറിയിച്ചു.
സ്വാഗതസംഘം ചെയര്മാന് മേയര് തോട്ടത്തില് രവീന്ദ്രന്, ജനറല് കണ്വീനറും ഡിഡിഇയുമായ ഡോ. ഗിരീഷ് ചോലയില്, കോര്പറേഷന് വിദ്യാഭ്യാസ സ്റ്റാന്ഡിങ് കമ്മിറ്റി ചെയര്മാനും സംഘാടകസമിതി വൈസ് ചെയര്മാനുമായ എം. രാധാകൃഷ്ണന്, പ്രോഗ്രാം കമ്മിറ്റി കണ്വീനര് പി.കെ. അരവിന്ദന്, റിസപ്ഷന് കമ്മിറ്റി കണ്വീനര് അഷറഫ് കുരുവട്ടൂര്, ജെഡിടി സ്കൂള് പ്രിന്സിപ്പാള് അബ്ദുള് കബീര്, മീഡിയ കമ്മിറ്റി കണ്വീനര് ഡോ. കൃഷ്ണന് പി. നമ്പൂതിരി എന്നിവര് വാര്ത്താസമ്മേളനത്തില് പങ്കെടുത്തു.
