ചങ്ങനാശ്ശേരി: ഹൈന്ദവരുടെ കാര്യങ്ങള് പൊതുചര്ച്ചയാക്കേണ്ട ആവശ്യമില്ലെന്ന് തിരുവിതാംകൂര് ദേവസ്വംബോര്ഡ് പ്രസിഡന്റ് പ്രയാര് ഗോപാലകൃഷ്ണന്. മന്നം ജയന്തി സമ്മേളനത്തില് ആശംസയര്പ്പിച്ചു സംസാരിക്കുകയായിരുന്നു അദ്ദേഹം.
മറ്റ് മതങ്ങളുടെ കാര്യങ്ങള് ഇവിടെയാരും പൊതുചര്ച്ചയ്ക്ക് എടുക്കുന്നില്ല. മതേതരത്വ രാജ്യമായ ഭാരതത്തില് ഏതുമതവും സ്വീകരിക്കാനും ആ മതത്തിന്റെ ആചാരങ്ങള് അനുഷ്ഠിക്കാനുമുള്ള സ്വാതന്ത്ര്യമുണ്ട്. വിശ്വസിക്കുന്ന മതത്തിന്റെ ആചാരങ്ങള് സംരക്ഷിക്കാന് ഭരണഘടനാ സ്ഥാപനങ്ങള്ക്ക് ബാധ്യതയുണ്ട്. അതിനാല് ഹൈന്ദവരുടെ ആചാരാനുഷ്ഠാനങ്ങളും സംരക്ഷിക്കപ്പെടണം.
നിത്യനൈഷ്ഠിക ബ്രഹ്മചാരിയായി യോഗതപസ്സിലാണ് ദേവദേവനായ ശ്രീഅയ്യപ്പന് ശബരിമലയില് വാഴുന്നത്. ആ തപസ്സിന് ഭംഗംസംഭവിക്കാതിരിക്കാനാണ് 365 ദിവസവും ക്ഷേത്രതുറക്കാനാവില്ലെന്ന നിലപാട് സ്വീകരിച്ചത്. ശബരിമല ക്ഷേത്രത്തിലെ ആചാരാനുഷ്ഠാനങ്ങള് സംരക്ഷിക്കപ്പെടുന്നതിനാണ് 10 വയസ്സിനും 50 വയസ്സിനും ഇടയിലുള്ള സ്ത്രീകള്ക്ക് പ്രവേശനം നല്കില്ലെന്ന് പറയുന്നതെന്നും പ്രയാര് ഗോപാലകൃഷ്ണന് പറഞ്ഞു.
