ആലപ്പുഴ: കുഞ്ചന്റെ കളിത്തൊട്ടിലായ അമ്പലപ്പുഴയില് റവന്യു ജില്ലാ സ്ക്കൂള് കലോത്സവത്തിന് ഇന്ന് തുടക്കമാകും. 11 ഉപജില്ലകളില്നിന്നായി 291 ഇനങ്ങളില് 2,345 വിദ്യാര്ത്ഥികള് മാറ്റുരയ്ക്കും. അമ്പലപ്പുഴ ഗവ. മോഡല് സ്കൂളില് മൂന്നും ഗവ. കോളേജില് മൂന്നും, അമ്പലപ്പുഴ ക്ഷേത്രത്തിന് സമീപത്തെ പി എന് പണിക്കര് സ്മാരക ഗവ. എല്പി സ്കൂളില് ഒന്നും, കുഞ്ചന്നമ്പ്യാര് സ്മൃതിമണ്ഡപത്തില് ഒന്നും, ആമേട ഗവ. എല്പിഎസില് ഒന്നും, റെയില്വേ സ്റ്റേഷന് സമീപത്തെ എന്എസ്എസിന്റെ ശിവശക്തി ഓഡിറ്റോറിയത്തില് ഒന്നും ഉള്പ്പെടെ 10 വേദികളിലായാണ് വിവിധ കലാമത്സരങ്ങള് അരങ്ങേറുക.
മത്സരാര്ത്ഥികള്ക്കും ഒപ്പമുള്ളവര്ക്കും വിശ്രമത്തിനും താമസിക്കാനുമായി അമ്പലപ്പുഴ ഗവ. കോളേജിലും മോഡല് എച്ച്എസിലുമായി 13 ക്ളാസ്മുറികളും ഹാളുകളും സജ്ജമാക്കി. വിവിധ വേദികളിലേക്ക് വഴികാട്ടുന്നതിനും മറ്റുസഹായങ്ങള്ക്കുമായി എന്സിസി, എന്എസ്എസ്, സ്റ്റുഡന്റ്സ് പോലീസ് കേഡറ്റ്, സ്കൗട്ട് ആന്ഡ് ഗൈഡ്സ് തുടങ്ങി നിത്യേന 200 ഓളം പേരുടെ സേവനവും ഉറപ്പുവരുത്തി.
ഒപ്പം ആയുര്വേദ, അലോപ്പതി, ഹോമിയോപ്പതി ഡോക്ടര്മാരുള്പ്പെടെയുള്ള ആരോഗ്യപ്രവര്ത്തകരുടെ സേവനവും ഫയര്ഫോഴ്സിന്റെ സേവനവും മുഴുവന് വേദികളിലും കുടിവെള്ളവും തിളപ്പിച്ചാറിയ വെള്ളവും ലഭ്യമാക്കും.
അമ്പലപ്പുഴ കുഞ്ചന്നമ്പ്യാര് സ്മാരക ഓഡിറ്റോറിയത്തില് നിത്യേന പായസം ഉള്പ്പെടെയുള്ള വിഭവങ്ങളാകും വിളമ്പുക. ഇന്ന് രാവിലെ ഒമ്പതിന് വിദ്യാഭ്യാസ ഉപഡയറക്ടര് വി അശോകന് പതാക ഉയര്ത്തുന്നതോടെ രചനാമത്സരങ്ങള്ക്ക് തുടക്കമാകും. പകല് മൂന്നിന് കച്ചേരിമുക്കിലെ കെ കെ കുഞ്ചുപിള്ള സ്മാരക ഹാളില്നിന്ന് സമീപത്തെ വിവിധ സ്കൂളുകളില്നിന്നുള്ള വിദ്യാര്ത്ഥികളും കുടുംബശ്രീ അംഗങ്ങളും പങ്കെടുത്ത് വാദ്യമേളങ്ങളുടെയും വിവിധ കലാരൂപങ്ങളുടെയും അകമ്പടിയോടെ വിളംബരഘോഷയാത്ര. പ്രധാനവേദിയായ മോഡല് സ്കൂളില് മന്ത്രി ജി. സുധാകരന് കലാമേള ഉദ്ഘാടനം ചെയ്യും.
അമ്പലപ്പുഴ ഉപജില്ലയിലെ ക്ളാസ്റൂം ലൈബ്രറി സംവിധാനത്തിന്റെ മൂന്നാംഘട്ട ഉദ്ഘാടനവും മന്ത്രി നിര്വഹിക്കും. ജില്ലാ പഞ്ചായത്ത് പ്രസിഡന്റ് ജി. വേണുഗോപാല് അദ്ധ്യക്ഷനാകും. കലാമേള ഏഴിന് സമാപിക്കും.
