നിലമ്പൂര്: കാലവര്ഷത്തിന് പുറമേ തുലാവര്ഷം കൂടി കൈവിട്ടതോടെ ആഢ്യന്പാറ ജല വൈദ്യുത പദ്ധതി നിലച്ചു. കാഞ്ഞിരപ്പുഴയെ ആശ്രയിച്ച് പ്രവര്ത്തിക്കുന്ന ജില്ലയിലെ ആദ്യത്തെ ചെറുകിട വൈദ്യുതി പദ്ധതിയാണ് ജലലഭ്യതക്കുറവ് വൈദ്യുതോദ്പാദനം നിര്ത്താന് നിര്ബന്ധിതമായിരിക്കുന്നത്.
ആഢ്യന്പാറ ചെറുകിട ജലവൈദ്യുത പദ്ധതി 2015 ജൂണിലാണ് പ്രവര്ത്തനം ആരംഭിച്ചത്. ഡിസംബറില് ജലലഭ്യത കുറഞ്ഞതോടെ പ്രവര്ത്തനം നിര്ത്തുകയും 2016 ജൂണില് വീണ്ടും പ്രവര്ത്തനം ആരംഭിക്കുകയുമാണ് ചെയ്തത്. 2017 ഫെബ്രുവരിവരെ പ്രവര്ത്തിക്കാനാകുമെന്നാണ് കരുതിയിരുന്നത്. പക്ഷേ എല്ലാ പ്രതീക്ഷകളും തകിടംമറിച്ചുകൊണ്ട് പുഴ വറ്റിയതോടെ ഡിസംബര് അവസാനവാരത്തില് തന്നെ നിലയത്തിന് പൂട്ടുവീണു.
ഒന്നര മെഗാവാട്ട് ശേഷിയുള്ള രണ്ടും അര മെഗാവാട്ട് ശേഷിയുള്ള ഒരു ജനറേറ്ററുമാണ് പദ്ധതിയിലുള്ളത്. ഇതില് അര മെഗാവാട്ടിന്റെ ജനറേറ്റര് മാത്രമാണ് കുറച്ച് ദിവസമായി പ്രവര്ത്തിച്ചിരുന്നത്. അതും പ്രവര്ത്തിക്കാനാവതെ വന്നപ്പോഴാണ് തല്ക്കാലം വൈദ്യുതോദ്പാദനം നിര്ത്തിവെക്കാന് അധികൃതര് തീരുമാനിച്ചത്.
ഹൈഡ്രല് പദ്ധതികള്ക്ക് കേന്ദ്ര പരിസ്ഥിതി മന്ത്രാലയത്തിന്റെ അനുമതി ലഭിക്കാത്ത സാഹചര്യത്തില് ചെറുകിട പദ്ധതികളിലൂടെ പരമാവധി വൈദ്യുതി സമാഹരിക്കുന്നതിനായാണ് ഇത്തരത്തില് ചെറുകിട പദ്ധതികള് ആരംഭിച്ചത് എന്നാല് ജലത്തെ മാത്രം ആശ്രയിക്കുന്ന ഇത്തരം പദ്ധതികള്ക്ക് മഴക്കുറവ് കനത്ത തിരിച്ചടിയാണ് നല്കുന്നത്. നിലമ്പൂര് മേഖലയിലെ വൈദ്യുതി പ്രതിസന്ധിക്ക് ഒരു പരിധിവരെ പരിഹാരം കാണാനാകുമെന്ന പ്രതീക്ഷയിലായിരുന്നു പദ്ധതി തുടക്കം കുറിച്ചത്.
