ബത്തേരി : കേന്ദ്രസര്ക്കാര് ഡിജിറ്റല് സാമ്പത്തിക സാക്ഷരതാ യജ്ഞത്തിന്റെ ഭാഗമായി വയനാട് ജില്ലയിലെ ബത്തേരി താലൂക്കിനെ അക്ഷയയുടെ നേതൃത്വത്തില് പണരഹിത താലൂക്കായി പ്രഖ്യാപിക്കുന്നു.
അക്ഷയ പ്രൊജക്ട്, വികാസ് പീഡിയ കേരള, ലീഡ് ബാങ്ക് എന്നിവയുടെ നേതൃത്വത്തിലാണ് ബത്തേരി മദ്രസ ഹാളില് പരിപാടി സംഘടിപ്പിച്ചിട്ടുള്ളത്. ഓട്ടോറിക്ഷ ഡ്രൈവര്മാര്ക്കും വ്യാപാരികള്ക്കുമുള്ള കറന്സിലെസ് ഡിജിറ്റല് ശില്പശാലയും ഇതോടനുബന്ധിച്ച് നടക്കും.
വിവിധ മൊബൈല് ആപ്ലിക്കേഷനുകള് ഓണ്ലൈന് സംവിധാനങ്ങള് എന്നിവ ശില്പശാലയില് പരിചയപ്പെടുത്തും.
ഒരു വില്ലേജിലെ നാല്പ്പത് ഉപഭോക്താക്കളും പത്ത് വ്യാപാരികളും ഡിജിറ്റല് സംവിധാനത്തിലേക്ക് മാറിയാല് അവിടം ക്യാഷ്ലെസ്സ് ആയി പ്രഖ്യാപിക്കാം എന്നാണ് കേന്ദ്രസര്ക്കാര് നിര്ദ്ദേശം.
ബത്തേരി താലൂക്കിലെ ബത്തേരി മുനിസിപ്പാലിറ്റി, നെന്മേനി, നൂല്പ്പുഴ, അമ്പലവയല്, പൂതാടി, പുല്പ്പള്ളി, മുള്ളന്കൊല്ലി എന്നിവിടങ്ങളില് പൊതുജനങ്ങള് പരിശീലനം പൂര്ത്തിയാക്കുകയും ഡിജിറ്റല് സംവിധാനത്തിലേക്ക് മാറുകയും ചെയ്തിട്ടുണ്ട്.
സമ്പൂര്ണ്ണ ഡിജിറ്റല് പ്രഖ്യാപനം, ഇന്ന് രാവിലെ 10.30ന് നടക്കുന്ന ചടങ്ങില് ബത്തേരി താലൂക്കിനെ സമ്പൂര്ണ്ണ ഡിജിറ്റല് താലൂക്കായി ഐ.സി.ബാലകൃഷ്ണന് എംഎല്എ പ്രഖ്യാപിക്കും. ജനപ്രതിനിധികള്, ഉദ്യോഗസ്ഥര്, സന്നദ്ധപ്രവര്ത്തകര്, അക്ഷയ സംരംഭകര്, ഫിനാന്സ് ലിറ്ററസി കൗണ്സിലര്മാര് എന്നിവര് ചടങ്ങില് സംബന്ധിക്കും.
