കല്പ്പറ്റ : നാമമാത്രമായ നിയമനങ്ങള് നടന്ന നൂറ്റിയെണ്പതോളം റാങ്കു ലിസ്റ്റുകള് തള്ളാനുള്ള പിഎസ്സിയുടെ തീരുമാനം പിന്വലിക്കണമെന്നും ഇത്തരം പട്ടികകള്ക്ക് കാലാവധി നീട്ടി നല്കണമെന്നും ആവശ്യപ്പെട്ടുകൊണ്ട് യുവമോര്ച്ച് പി.എസ്.സി ഓഫീസിലേക്ക് മാര്ച്ചു നടത്തി.
അഞ്ചുവര്ഷത്തിനുള്ളില് അഞ്ചു ലക്ഷം പേര്ക്ക് തൊഴില് നല്കുമെന്ന് ഉറപ്പു നല്കി അധികാരത്തിലെത്തിയ പിണറായി വിജയന് സര്ക്കാര് ബന്ധു നിയമനങ്ങളില് ശ്രദ്ധ കേന്ദ്രീകരിച്ചുകൊണ്ട് കേരളത്തിലെ യുവജനങ്ങളെ വഞ്ചിക്കുന്ന നിലപാടാണ് സ്വീകരിക്കുന്നതെന്ന് മാര്ച്ച് ഉദ്ഘാടനം ചെയ്തു കൊണ്ട് ഭാരതീയ ജനതാപാര്ട്ടി ജില്ലാ പ്രസിഡന്റ് സജി ശങ്കര് പറഞ്ഞു.
പതിനഞ്ചോളം പട്ടികകളിലായി ഇരുപത്തിയയ്യായിരത്തോളം ആളുകള് കാത്തിരുന്ന ഹയര് സെക്കന്ററി അദ്ധ്യാപക പട്ടികയാണ് ഇതില് പ്രധാനം. ആയിരത്തി ഇരുനൂറ്റി അമ്പതോളം ആളുകളുള്ള സ്റ്റാഫ് നഴ്സ് പട്ടികയുടെ സ്ഥിതിയും വ്യത്യസ്ഥമല്ല. സംസ്ഥാനത്തുടനീളം ആയിരക്കണക്കിന് ഒഴിവുകള് നിലനില്ക്കുമ്പോഴും നാമമാത്രമായ നിയമനങ്ങള് മാത്രമാണ് ഇതില് നടന്നത്.
സാമ്പത്തികമായ ബാധ്യതയുടെ പേരിലാണ് നിയമനങ്ങള് നടത്താന് സര്ക്കാര് തയ്യാറാകാത്തത്. ഇത് റാങ്ക് പട്ടികയിലുള്ള ലക്ഷക്കണക്കിന് ഉദ്യോഗാര്ത്ഥികളെ ബാധിക്കും. ഡിസംബര് 31 ന് കാലാവധി അവസാനിക്കുന്ന പട്ടികകള്ക്ക് സമയം നീട്ടി നല്കണ്ടയെന്നാണ് സര്ക്കാര് നിലപാട്. ഇത് തികച്ചും പ്രതിഷേധാര്ഹമാണ്. ഇതിനെതിര സമരപരിപാടികളുമായി യുവമോര്ച്ച മുന്നോട്ടു പേകും.
യുവമോര്ച്ച ജില്ലാ ജനറല് സെക്രട്ടറി പ്രശാന്ത് മലവയല് അദ്ധ്യക്ഷത വഹിച്ചു. ജിതിന് ഭാനു, അജീഷ് എം.ആര്, ബിനീഷ്, വിപിന് ദാസ്, അര്ജ്ജുന് എന്നിവര് സംസാരിച്ചു.
