ദമാസ്കസ്: ഏഴു വയസുകാരിയെ മാതാപിതാക്കള് തന്നെയാണ് സ്ഫോടകവസ്തുക്കളുമായി പോലീസ് സ്റ്റേഷനിലേക്ക് പറഞ്ഞ് വിട്ടതെന്ന് വെളിപ്പെടുത്തല്. കുട്ടിയുടെ മാതാപിതാക്കള് ഇവള്ക്ക് ഉമ്മ നല്കി പോലീസ് സ്റ്റേഷനിലേക്ക് അയക്കുന്ന ദൃശ്യങ്ങളാണ് ഇപ്പോള് ഇന്റര്നെറ്റില് പരക്കുന്നത്.
അച്ഛന് തന്നെയാണ് പോലീസ് സ്റ്റേഷനടുത്ത് നിന്ന് റിമോട്ട് ഉപയോഗിച്ച് സ്ഫോടനം നടത്തിയതെന്നും വ്യക്തമായിട്ടുണ്ട്. ഒമ്പതും ഏഴും വയസുളള പെണ്കുട്ടികളെ മാതാപിതാക്കള് തീവ്രവാദികളാക്കുന്നതിന്റെ ദൃശ്യങ്ങളും ഉണ്ട്. ഇന്ന് എന്താണ് ചെയ്യാന് പോകുന്നതെന്ന് അച്ഛന് ചോദിക്കുന്നതിന്റെയും ചാവേര് ആക്രമണം നടത്താന് പോകുന്നുവെന്ന പെണ്കുട്ടിയുടെ മറുപടിയും ഇതിലുണ്ട്. പേടിക്കേണ്ടെന്നും സ്വര്ഗത്തിലേക്കാണ് പോകുന്നതെന്നും കുട്ടിയെ ആശ്വസിപ്പിക്കുന്നുമുണ്ട്. കുട്ടിയും അത് ശരിവയ്ക്കുന്നു.
ഏഴും ഒമ്പതും വയസുളള ഇസ്ലാം, ഫാത്തിമ എന്നീ പെണ്കുട്ടികളെ സ്വന്തം അമ്മ ആവര്ത്തിച്ച് ആലിംഗനം ചെയ്യുന്ന ദൃശ്യങ്ങളുമുണ്ട്. എല്ലാ മുസ്ലീങ്ങളും വിശുദ്ധ പോരാട്ടത്തില് പങ്കെടുക്കണമെന്നാണ് കുട്ടികളെ സ്ഫോടനത്തിന് അയക്കുന്നത് എന്തിനെന്ന ചോദ്യത്തിന് അമ്മ മറുപടി നല്കുന്നത്. ഇതില് കുട്ടികളും വലിയവരുമില്ലെന്നും അവര് പറയുന്നു.
പ്രാര്ത്ഥന തുടങ്ങും മുമ്പ് പെണ്കുട്ടികള് അച്ഛന് പറഞ്ഞത് പ്രകാരം അളളാഹു അക്ബര് എന്ന് വിളിക്കുന്നുമുണ്ട്.
ഈ മാസം പതിനാറിനാണ് ബാത്ത്റൂം അന്വേഷിച്ചെത്തിയ പെണ്കുട്ടി പോലീസ് സ്റ്റേഷനില് പൊട്ടിത്തെറിച്ചത്. സംഭവത്തില് മൂന്ന് പോലീസുകാര്ക്ക് പരിക്കേറ്റു. ഏത് തീവ്രവാദ സംഘമാണ് ആക്രമണത്തിന് പിന്നിലെന്ന് വ്യക്തമായിട്ടില്ല. സിറിയന് മനുഷ്യാവകാശ സംഘടനയും ഇത്തരമൊരു ആക്രമണം നടന്നതായി സ്ഥിരീകരിച്ചിട്ടുണ്ട്. എന്നാല് കാരണം വ്യക്തമാക്കിയിട്ടില്ല.
