മാനന്തവാടി : ജില്ലാ ആശുപത്രിയില് വാക്സിനേഷന് മണിക്കൂറുകളോളം മുടങ്ങി. പ്രതിരോധ കുത്തിവെപ്പ് കിട്ടാത്തത് കാരണമാണ് ആരോഗ്യ വകുപ്പ് ജീവനക്കാരന് മരിച്ചത് എന്നു പറഞ്ഞാണ് ഒരു വിഭാഗം ജീവനക്കാര് വാക്സിനേഷന് എടുക്കാന് വന്നവരെ മടക്കി അയച്ചത്. ജീവനക്കാരുടെ അനാസ്ഥയില് ജില്ല ആശുപത്രിയില് മണിക്കൂറുകളോളം വാക്സിനേഷന് മുടങ്ങുകയായിരുന്നു.
ബുധന്, വെളളി ദിവസങ്ങളിലാണ് ആശുപത്രിയില് വാക്സിന് വിതരണം നടക്കുന്നത്. നവജാത ശിശുക്കള്ക്ക് എടുക്കേണ്ട ബി. സി.ജി കുത്തിവെപ്പ് ഉള്പ്പെടെയാണ് മുടങ്ങിയത്. വാക്സിനേഷന് എടുക്കാന് വന്ന ആദിവാസി കുട്ടികള് ഉള്പ്പെടെയുള്ള അമ്മമാരെ അടുത്ത വെള്ളിയാഴ്ച വരാന് പറഞ്ഞ് മടക്കി അയക്കുകയായിരുന്നു. ഉദ്യോഗസ്ഥര് കുത്തിവെപ്പ് കേന്ദ്രത്തിലേക്കുള്ള വാതിലും അടച്ചുപൂട്ടി. ഇത് അറിഞ്ഞെത്തിയ യുവമോര്ച്ച പ്രവര്ത്തകര് ജില്ലാ ജനറല് സെക്രട്ടറി ജിതിന്ഭാനുവിന്റെ നേതൃത്വത്തില് സൂപ്രണ്ടിനെ കണ്ട് കാര്യങ്ങള് ധരിപ്പിക്കുകയും കുത്തിവെപ്പിനായെത്തിയ മുഴുവന് കുട്ടികള്ക്കും അതിനുള്ള സാഹചര്യം ഒരുക്കണമെന്ന് ആവശ്യപ്പെടുകയും ചെയ്തു. തുടര്ന്ന് സൂപ്രണ്ട് ജീവനക്കാര്ക്ക് നിര്ദ്ദേശം നല്കുകയായിരുന്നു. എന്നാല് കുത്തിവെപ്പില്ല എന്നു പറഞ്ഞതിന്റെ അടിസ്ഥാനത്തില് ഒരുപാടുപേര് ഇതിനകം മടങ്ങിപോയിരുന്നു.
ജീവനക്കാരുടെ ഇത്തരത്തിലുള്ള സമീപനങ്ങള് യാതൊരു കാരണവശാലും അംഗീകരിക്കാന് കഴിയില്ലെന്ന് യുവമോര്ച്ച ഭാരവാഹികള് അറിയിച്ചു.
