ചെറുപുഴ: നിലമ്പൂര് വനത്തില് മാവോയിസ്റ്റ് നേതാക്കള് ഏറ്റുമുട്ടലില് മരിച്ച സാഹചര്യത്തില് സംസ്ഥാനത്ത് മാവോയിസ്റ്റ് അക്രമം ഉണ്ടാകുമെന്ന് രഹസ്യാന്വേഷണ വിഭാഗം റിപ്പോര്ട്ട് ചെയ്യുമ്പോഴും അതിര്ത്തിഗ്രാമങ്ങളില് പൊലീസ് ഒരു സുരക്ഷയും ഇതുവരെ ഒരുക്കാത്തത് ജനങ്ങളെ ഭീതിയിലാഴ്ത്തുകയാണ്. ചെറുപുഴ പഞ്ചായത്തിലെ കാനംവയല്, കോഴിച്ചാല് റവന്യൂ, ആറാട്ട്കടവ് തുടങ്ങി നിരവധി ഗ്രാമങ്ങളാണ് കര്ണാടക വനത്തിനോട് ചേര്ന്ന് നില്ക്കുന്നത്. സംസ്ഥാനത്ത് ആദ്യമായി കര്ഷകരെ മാവോയിസ്റ്റുകള് ബന്ദിയാക്കിയത് ചെറുപുഴ പൊലീസ് സ്റ്റേഷന് പരിധിയിലെ കാനംവയലിലാണ്. രണ്ട് വര്ഷം മുമ്പ് ഇവിടെ പൊലീസ് ഔട്ട്പോസ്റ്റ് സ്ഥാപിച്ചെങ്കിലും ഇപ്പോള് അതും അടച്ചുപൂട്ടി. വനത്തിനകത്ത് പണിക്കുപോയ തൊഴിലാളികളെയാണ് അന്ന് മാവോയിസ്റ്റുകള് തടഞ്ഞുവെച്ചത്. ഇപ്പോള് മാവോയിസ്റ്റ് ഭീഷണി വന്നതറിഞ്ഞ് പണിക്കുപോകാന് പോലും നാട്ടുകാര് ഭയക്കുകയാണ്.
പൊലീസ് രാത്രികാല നിരീക്ഷണംപോലും നടത്താറില്ല. പകല് സമയങ്ങളില് കാനംവയലിലേക്ക് ദൂരം അധികമായതിനാല് പെറ്റിക്കേസുകള് ഉണ്ടാക്കി കറങ്ങുയാണ് ചെറുപുഴ പൊലീസ് ചെയ്യുന്നത്. പെറ്റിക്കേസുകളുടെ എണ്ണം കൂട്ടി മേലുദ്യോഗസ്ഥരുടെ പ്രീതി സമ്പാദിക്കുകയാണ് കഴിഞ്ഞ കുറെക്കാലമായി ചെറുപുഴ പൊലീസ് ചെയ്യുന്നത്. ചെറുപുഴ പഞ്ചായത്തിലെ വിവിധ പ്രദേശങ്ങളില് മാവോയിസ്റ്റ് സാനിധ്യം നേരത്തെ റിപ്പോര്ട്ട് ചെയ്തിരുന്നു. അതിര്ത്തി ഗ്രാമങ്ങളില് നേരത്തെ പൊലീസ് മാവോയിസ്റ്റ് പ്രവര്ത്തനം തടയാന് നിരവധി പദ്ധതികള് നടപ്പാക്കിയെങ്കിലും ഇപ്പോള് പൊലീസ് മാസത്തിലൊരിക്കല്പ്പോലും കോളനികള് സന്ദര്ശിക്കാത്തത് മാവോയിസ്റ്റുകള്ക്ക് പ്രവര്ത്തിക്കാന് അവസരമൊരുക്കുകയാണ്.
