വെള്ളമുണ്ട : ബ്രിട്ടീഷ് സാമ്രാജ്യത്വത്തിനെതിരെ സന്ധിയില്ലാ സമരം നടത്തി രണ്ട് നൂറ്റാണ്ടുകഴിഞ്ഞിട്ടും അവഗണനയുടെ പ്രതിരൂപമായികഴിയുന്ന ധീരയോദ്ധാവ് എടച്ചന കുങ്കന്റെ സ്മൃതിദിനം ഇന്ന്. ഇരുന്നൂറ്റി പന്ത്രണ്ടാം സ്മൃതി ദിനമായ ഇന്നുവരെ എടച്ചന കുങ്കന് ഒരു സ്മാരകം നിര്മ്മിക്കാന് പോലും നമ്മുടെ ഭരണാധികാരികള്ക്ക് സാധിച്ചിട്ടില്ല. എടച്ചന കുങ്കന് അന്തിയുറങ്ങുന്ന പുളിഞ്ഞാലില് ഇന്ന് സാമൂഹ്യവിരുദ്ധരുടെ കേന്ദ്രമാണ്. പഴശ്ശിരാജാവിന്റെ മുന്നണിപ്പോരാളിയായിരുന്ന എടച്ചന കുങ്കന് ഇന്നും അവഗണനയുടെ പ്രതിരൂപമായി നില നില്ക്കുന്നു.
നമ്മുടെ നാട്ടില് ബ്രിട്ടീഷ്കാര്ക്കെതിരെ ആദ്യത്തെ സ്വാതന്ത്ര്യസമരം നയിച്ച പഴശിരാജാവിനും എടച്ചനകുങ്കനും തലക്കരചന്തുവിനും അര്ഹിക്കുന്ന ബഹുമതികളോടെയുളള സ്മാരകം നിര്മ്മിക്കാന് ഇവിടുത്തെ ജനപ്രതിനിധികളും ഭരണകൂടവും തയ്യാറാവണമെന്നും പുളിഞ്ഞാലിലുളള സര്ക്കാര് സ്കൂളിന് എടച്ചന കുങ്കന്റെ പേരിടണമെന്നുമുള്ള ദേശസ്നേഹികളുടെ ആവശ്യത്തിനുനേരെ അധികൃതര് മുഖംതിരിക്കുകയാണ്.
എടച്ചനകുങ്കന് സ്മാരകസമിതിയുടെ നേതൃത്വത്തില് കഴിഞ്ഞവര്ഷം പുളിഞ്ഞാലില് നടന്ന അനുസ്മരണ പരിപാടികള് തടസ്സപ്പെടുത്താന് തൊണ്ടര്നാട് ഗ്രാമപഞ്ചായത്ത് വൈസ്പ്രസിഡന്റിന്റെ നേതൃത്വത്തില് ശ്രമമുണ്ടായി. ഇത്തരത്തില് നാട്ടിലെ ധീരദേശാഭിമാനികള്ക്ക് ആവശ്യമായ അംഗീകാരം നല്കുന്നതിനെ എതിര്ക്കുന്ന തരത്തില്വരെയാണ് കാര്യങ്ങള് എത്തിനില്ക്കുന്നത്. രാഷ്ട്രവിരുദ്ധ ശക്തികളെ പ്രോത്സാഹിപ്പിക്കാനുള്ള ഇത്തരം പ്രവണതകള് രാജ്യത്തെതന്നെ ഇല്ലാതാക്കുമെന്ന തിരിച്ചറിവ് ജനപ്രതിനിധികള്ക്കെങ്കിലും ഉണ്ടാവേണ്ടതുണ്ട്.
