ഹൈദരാബാദ്: വര്ധ ചുഴലിക്കാറ്റില് ആന്ധ്രാപ്രദേശില് രണ്ടു പേര് മരിച്ചതായി ഔദ്യോഗിക സ്ഥിരീകരണം. ആന്ധ്രാ തീരത്തും റായല്സീമയിലും മഴ തുടരുകയാണ്. കര്ണാടകയുടെ പല ഭാഗത്തും ശക്തമായി മഴ പെയ്യുന്നുണ്ട്.
നെല്ലൂര്, പ്രകാശം, ചിറ്റൂര്, കടപ്പ, അനന്ത്പൂര് എന്നീ ജില്ലകളിലാണ് മഴ തുടരുന്നത്. കാറ്റില് തകരാറിലായ വൈദ്യുതി ബന്ധവും ഗതാഗത സംവിധാനവും സാധാരണ നിലയിലാക്കുന്നതിനുള്ള പ്രവര്ത്തനങ്ങള് പുരോഗമിക്കുകയാണ്. തുടര്ച്ചയായ മഴ കാരണം ചിറ്റൂര് ജില്ലയിലെ പല ഭാഗങ്ങളും വെള്ളത്തിന് അടിയിലാണ്. തിരുപ്പതി ക്ഷേത്രത്തില് എത്തിയവരെയും വര്ധ ചുഴലിക്കാറ്റ് വലച്ചു.
മുഖ്യമന്ത്രി ചന്ദ്രബാബു നായിഡു ഉന്നത ഉദ്യോഗസ്ഥരുടെ യോഗം വിളിച്ച് സ്ഥിതി വിലയിരുത്തി. റവന്യൂ, പോലീസ് ഉള്പ്പടെയുള്ള വിഭാഗങ്ങള് ജാഗ്രത പാലിക്കണമെന്ന് ചന്ദ്രബാബു നായിഡു നിര്ദേശം നല്കി. കര്ണാടകയിലെ അതിര്ത്തി ഗ്രാമങ്ങളില് ഇപ്പോഴും മഴയും കാറ്റും തുടരുകയാണ്. അടുത്ത പന്ത്രണ്ട് മണിക്കൂര് കൂടി കര്ണാടകയില് മഴ തുടരുമെന്ന്കാലാവസ്ഥാ നിരീക്ഷണ കേന്ദ്രം അറിയിച്ചിട്ടുണ്ട്.
