പോര്ട്ട്ബ്ലെയര്: ആന്ഡമാന് നിക്കോബാറിലെ ഹാവ്ലോക്ക് ദ്വീപില് 1000 ത്തോളം വിനോദസഞ്ചാരികള് കുടുങ്ങി കിടക്കുന്നതിയി ലെഫ്റ്റനന്റ് ഗവര്ണര് ജഗ്ദീഷ് മുഖി. ഇതില് 320 പേര് വിദേശികളാണ്. പതികൂല കാലാവസ്ഥ കാരണം തടസ്സപ്പെട്ടിരുന്ന രക്ഷാപ്രവര്ത്തനം ഇന്ന് വീണ്ടും ആരംഭിച്ചതായും ഗവര്ണര് വ്യക്തമാക്കി.
ഇന്ത്യന് നാവിക സേനയുടെ ഐഎന്എസ് ബിത്ര, ഐഎന്എസ് ബംഗാരം, ഐഎന്എസ് കുംബിര്, എല്സിയു 38 അടക്കം ആറ് യുദ്ധക്കപ്പലുകള്, മൂന്നു നാവികസേനാ ഹെലികോപ്റ്ററുകള്, രണ്ട് തീരസംരക്ഷസേന കപ്പലുകള് എന്നിവയാണ് രക്ഷാപ്രവര്ത്തനങ്ങളില് ഏര്പ്പെട്ടിരിക്കുന്നത്.
ഹാവ് ലോക് ഐലന്ഡില് അകപ്പെട്ട വിനോദ സഞ്ചാരികളെ ആന്ഡമാന് ഭരണകൂടം കടത്തുബോട്ടുകളില് പോര്ട്ട്ബ്ലെയര് തുറമുഖത്ത് എത്തിച്ചതായി അധികൃതര് വ്യക്തമാക്കി. തുറമുഖത്തിന് പുറത്ത് നങ്കൂരമിട്ടിരിക്കുന്ന നാവികസേനയുടെ കപ്പലുകളില് എത്തിക്കാനുള്ള പ്രവര്ത്തനങ്ങളാണ് ഇപ്പോള് പുരോഗമിക്കുന്നത്.
ആന്ഡമാന് ഭരണകൂടത്തിന്റെ ആവശ്യപ്രകാരം ബുധനാഴ്ച പോര്ട്ട്ബ്ലെയറില് എത്തിയ കപ്പലുകളില് ഭക്ഷണം, കുടിവെള്ളം, മരുന്നുകള്, വിദഗ്ധ ഡോക്ടര്മാര് അടക്കമുള്ള സേവനങ്ങള് സജ്ജമാക്കിയിട്ടുണ്ടെന്ന് പ്രതിരോധ മന്ത്രാലയം അറിയിച്ചു.
കഴിഞ്ഞ കുറച്ചു ദിവസമായി ഇവിടെ കനത്ത മഴയും കാറ്റുമാണ്. ഇതുമൂലം പ്രദേശത്തെ മരങ്ങള് കടപുഴകുകയും വൈദ്യുതി വിതരണം തടസപ്പെടുകയും ചെയ്തിട്ടുണ്ട്. കൂടാതെ മൊബെയില്, ഇന്റര്നെറ്റ് സര്വീസും തടസപ്പെട്ടിരിക്കുകയാണ്. പോര്ട്ട് ബ്ലെയറില് 220 മില്ലിമീറ്റര് മഴയാണ് ലഭിച്ചത്.24 മണിക്കൂര് കൊണ്ട് 374.4 മില്ലീമീറ്റര് മഴയാണ് ദ്വീപില് ലഭിച്ചിരിക്കുന്നത്. 40 വര്ഷത്തിനിടെ ആദ്യമായാണ് ഇത്രയും കനത്ത മഴ ലഭിക്കുന്നത്. താഴ്ന്ന പ്രദേശങ്ങളെല്ലാം വെള്ളത്തിനടിയിലാണ്. അടുത്ത 24 മണിക്കൂര് കൂടി ശക്തമായ മഴ ലഭിക്കുമെന്നാണ് കാലാവസ്ഥാ നിരീക്ഷണകേന്ദ്രത്തിന്റെ വിലയിരുത്തല്.
തെക്ക് കിഴക്ക് ബംഗാള് ഉള്ക്കടലില് രൂപപ്പെട്ട ന്യൂനമര്ദമാണ് ആന്ഡമാന് നിക്കോബാര് ദ്വീപുകളില് കൊടുങ്കാറ്റിനും കനത്ത മഴക്കും കാരണമായത്. തലസ്ഥാനമായ പോര്ട്ട്ബ്ലെയറില് നിന്ന് 40 കിലോമീറ്റര് അകലെ സ്ഥിതി ചെയ്യുന്ന പ്രശസ്ത ബീച്ച് ടൂറിസം കേന്ദ്രമാണ് ഹാവ് ലോക് ദ്വീപുകള്.
