കണ്ണൂര്: ക്രിസ്തുമസ്-പുതുവത്സരാഘോഷത്തോടനുബന്ധിച്ച് ജില്ലയില് വ്യാജമദ്യം തടയുന്നതിന് എക്സൈസ് വകുപ്പ് പ്രവര്ത്തനം ഊര്ജിതമാക്കി. ഇതിനായി ജില്ലാതല കണ്ട്രോള് റൂമുകള്, താലൂക്ക്തല സ്ട്രൈക്കിംഗ് ഫോഴ്സുകള്, ബോര്ഡര് പട്രോളിംഗ് എന്നിവ പ്രവര്ത്തനം ആരംഭിച്ചതായി ഡപ്യൂട്ടി എക്സൈസ് കമ്മീഷണര് അറിയിച്ചു. മയക്കുമരുന്ന്, മദ്യം എന്നിവയുടെ സംഭരണം, വിപണനം, കടത്ത് എന്നിവ ശ്രദ്ധയില്പ്പെട്ടാല് പൊതുജനങ്ങള്ക്കും വിവരമറിയിക്കാം. സഹായകരമായ വിവരം നല്കുന്നവര്ക്ക് സര്ക്കാര് വക പാരിതോഷികങ്ങളും നല്കും.
നവപ്രഭ പദ്ധതി: അധ്യാപകര്ക്ക് പരിശീലനം നല്കി
കണ്ണൂര്: വിദ്യാലയങ്ങളിലെ പഠനപിന്നോക്കാവസ്ഥ പരിഹരിക്കാന് ലക്ഷ്യമിട്ട് ആര്എം എസ്എ നടപ്പാക്കുന്ന നവപ്രഭ പദ്ധതിക്ക് ജില്ലയിലെ വിദ്യാലയങ്ങളില് തുടക്കമായി. ജില്ലാ പഞ്ചായത്ത് സമഗ്ര വിദ്യാഭ്യാസ പരിപാടിയുടെ ഭാഗമായി നടപ്പാക്കുന്ന പദ്ധതിയില് റിസോഴ്സ് പേഴ്സണ്മാര്ക്കുളള പരിശീലനവും അധ്യാപക പരിശീലനവും നടത്തി. പദ്ധതിയുടെ ഭാഗമായി 45 മണിക്കൂര് അധിക പഠനസമയമാണ് ഓരോ വിദ്യാലയവും നീക്കിവെക്കുന്നത്. കണ്ണൂര് ഗവ.ഐടിഐ ഹാളില് നടന്ന റിസോഴ്സ് പേഴ്സണ്മാര്ക്കുളള പരിശീലന പരിപാടിയുടെ ഉദ്ഘാടന ചടങ്ങില് ജില്ലാ പഞ്ചായത്ത് പ്രസിഡണ്ട് കെ.വി.സുമേഷ്, ആരോഗ്യ-വിദ്യാഭ്യാസ സ്റ്റാന്റിങ്ങ് കമ്മിറ്റി ചെയര്മാന് കെ.പി.ജയബാലന്, ഡയറ്റ് പ്രിന്സിപ്പല് സി.എം.ബാലകൃഷ്ണന് തുടങ്ങിയവര് സംസാരിച്ചു.
