ചെന്നൈ: ബംഗാള് ഉള്ക്കടലില് രൂപപ്പെട്ട ‘നാഡ’ ചുഴലിക്കാറ്റ് ചെന്നൈ തീരത്തേയ്ക്ക് നീങ്ങുന്നതായി കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ഇതിനെ തുടര്ന്ന് ചെന്നൈയില് രണ്ട് ദിവസം ശക്തമായ കാറ്റോടു കൂടിയ മഴയുണ്ടായിരിക്കുമെന്നും ജനങ്ങള് ജാഗ്രത പാലിക്കണമെന്നും മുന്നറിയിപ്പ് നല്കിയിട്ടുണ്ട്.
തമിഴ്നാട് തീരത്ത് നിന്ന് 770 കിലോമീറ്റര് അകലെയാണ് ചുഴലിക്കാറ്റെന്നും മണിക്കൂറില് 25 കിലോമീറ്ററാണ് വേഗമെന്നും മുന്നറിയിപ്പില് പറയുന്നു. അടുത്ത 12 മണിക്കൂറില് ചുഴലിക്കാറ്റ് ശക്തിപ്രാപിക്കും. ഡിസംബര് ഒന്നിന് രാത്രിയിലോ രണ്ടിന് പുലര്ച്ചയ്ക്കോ കാറ്റ് തമിഴ്നാട് തീരത്ത് പ്രവേശിക്കുമെന്നും അറിയിപ്പില് പറയുന്നു.
വേദാരണ്യത്തിനും പുതുച്ചേരിയ്ക്കും ഇടയിലുള്ള തീരമേഖലകളിലാകും കാറ്റ് ആഞ്ഞടിക്കുക. കടല്ക്ഷോഭത്തിന് സാധ്യതയുള്ളതിനാല് മത്സ്യത്തൊഴിലാളികള് കടലില് പോകരുതെന്നും നിര്ദേശമുണ്ട്. ചുഴലിക്കാറ്റ് മുന്നറിയിപ്പിന്റെ പേരില് പരിഭ്രാന്തരാകേണ്ടെന്ന് ചെന്നൈ നിവാസികളോട് കാലാവസ്ഥ വിദഗ്ധര് അറിയിച്ചു.
ഒമാനാണ് ചുഴലിക്കാറ്റിന് നാഡ എന്ന പേരു നിര്ദേശിച്ചത്.
