കോഴിക്കോട്: മാസങ്ങള്ക്ക് ശേഷം വീണ്ടും സ്കൂള് മുറ്റത്ത് തിരിച്ചെത്തിയ മലാപ്പറമ്പ് സ്കൂള് വിദ്യാര്ത്ഥികള്ക്ക് അതിരറ്റ ആഹ്ലാദം. പടക്കംപൊട്ടിച്ചാണ് സ്കൂള് വിദ്യാര്ത്ഥികളെയും അധ്യാപകരെയും സ്കൂള് ഏറ്റെടുക്കല് പൂര്ത്തിയാക്കാനെത്തിയ മന്ത്രിയെയും സംഘത്തെയും നാട്ടുകാര് സ്വീകരിച്ചത്. ഔദ്യോഗികമായ നടപടികള് പൂര്ത്തിയാക്കിയശേഷം വൈകീട്ട് നാലോടെയാണ് മന്ത്രിയും സംഘവും കലക്ട്രേറ്റില് നന്ന് കുട്ടികളെയുമായി എത്തിയത്. ഓഫീസിലെത്തി പ്രധാനാധ്യാപിക എന്.എം. പ്രീതിയെ സ്കൂളിന്റെ ചുമതല ഏല്പ്പിച്ചു. തുടര്ന്ന് മധുരപലഹാരം വിതരണം. കൂടിനിന്നവര്ക്കെല്ലാം നാട്ടുകാരുടെയും സ്കൂള് സംരക്ഷണസമിതിയുടെയും നേതൃത്വത്തില് മധുരം നല്കി.
സ്കൂള് സര്ക്കാര് ഏറ്റെടുക്കുന്നതിനായി കൂട്ടായ പ്രവര്ത്തനം നടത്തിയ നാട്ടുകാരെയും രക്ഷിതാക്കളെയും സ്കൂള് സംരക്ഷണസമിതിയെയും മന്ത്രി അഭിനന്ദിച്ചു. സ്കൂള് നല്ലരീതിയില് നടത്തിക്കൊണ്ടുപോകാന് എല്ലാവരുടെയും കൂട്ടായശ്രമം ഉണ്ടാകണമെന്നും മന്ത്രി കൂട്ടിച്ചേര്ത്തു. പുതിയ കെട്ടിടം നിര്മ്മിക്കാന് ഒരു കോടി രൂപ നല്കുമെന്ന മന്ത്രിയുടെ പ്രഖ്യാപനം കയ്യടികളോടെയാണ് കൂടിനിന്നവര് സ്വീകരിച്ചത്. തങ്ങളുടെ പ്രയത്നം വിജയംകണ്ട സന്തോഷത്തിലായിരുന്നു നാട്ടുകാരും സ്കൂള് സംരക്ഷണസമിതി പ്രവര്ത്തകരും.
എ. പ്രദീപ്കുമാര് എംഎല്എ, മേയര് തോട്ടത്തില് രവീന്ദ്രന്, കോര്പ്പറേഷന് സ്റ്റാന്റിംഗ് കമ്മിറ്റി ചെയര്മാന്മാരായ കെ.വി.ബാബുരാജ്, രാധാകൃഷ്ണന്, കൗണ്സിലറും സ്കൂള് സംരക്ഷണസമിതി രക്ഷാധികാരിയുമായ ഇ. പ്രശാന്ത്കുമാര്, ഡിഡിഇ ഗിരീഷ് ചോലയില്, എഇഒ കെ.എസ്. കുസുമം, എഡിഎം ടി.ജെനില്കുമാര്, സിപിഎം ജില്ലാസെക്രട്ടറി പി. മോഹനന്, ഭാസിമലാപ്പറമ്പ്, വി.പി. രവീന്ദ്രന്, എം.സി. ബാലകൃഷ്ണന്, പി.പി. പ്രഭാകരക്കുറുപ്പ്, കെ. ജയനാഥന്, രാജന് കാനങ്ങോട്ട് തുടങ്ങിയവരും മന്ത്രിക്കൊപ്പമുണ്ടായിരുന്നു.
ഏഴാം ക്ലാസിലെ കെ.ടി. രജുല് ഇന്നലെ ആദ്യമായാണ് സ്കൂളില് എത്തിയത്. സിവില് സ്റ്റേഷനിലെ എഞ്ചിനീയേഴ്സ് ഹാളില് സ്കൂള് പ്രവര്ത്തിക്കുമ്പോഴാണ് റെജുല് സ്കൂളില് പ്രവേശനം നേടിയത്. അതിനാല് തന്നെ മറ്റുള്ളവര് പറഞ്ഞുള്ളഅറിവ് മാത്രമേ സ്കൂളിനെക്കുറിച്ച് റെജുലിന് ഉണ്ടായിരുന്നുള്ളൂ. നിലവില് 63 വിദ്യാര്ത്ഥികളും എട്ട് അധ്യാപകരും ഒരു അനധ്യാപക ജീവനക്കാരനുമാണ് സ്കൂളില് ഉള്ളത്.
