പത്തനാപുരം: സ്റ്റേറ്റ് ബാങ്ക് ഓഫ് ട്രാവന്കൂറിന്റെ പത്തനാപുരം ബ്രാഞ്ചില് തീപിടിത്തം. ജീവനക്കാരുടെ സമയോചിതമായ ഇടപെടല് മൂലം വന്ദുരന്തം ഒഴിവാക്കി.
ബുധനാഴ്ച വൈകിട്ട് 3.45നാണ് തീപിടിത്തം ഉണ്ടായത്. ബ്രാഞ്ചില് രാവിലെ മുതല് വൈദ്യുതിയുണ്ടായിരുന്നില്ല. തുടര്ന്ന് ജനറേറ്ററുകള് പുലര്ച്ചെ മുതല് പ്രവര്ത്തിക്കുകയായിരുന്നു. അമിതമായി പ്രവര്ത്തിച്ചതിനെ തുടര്ന്ന് ജനറേറ്റുകള് ചൂടാകുകയും സമീപത്ത് കൂട്ടിയിട്ടിരുന്ന പേപ്പറുകള്ക്ക് തീപിടിക്കുകയും ചെയ്തു. മിനിട്ടുകള്ക്കകം ബ്രാഞ്ചിനുള്ളില് പുക നിറഞ്ഞു. പുക ശ്വസിച്ച് പലര്ക്കും ദേഹാസ്ഥസ്ഥ്യവുമുണ്ടായി. അപ്പോഴേക്കും കൗണ്ടറില് ഉണ്ടായിരുന്ന ഇടപാടുകാരെയും വനിതാജീവനക്കാരെയും പുറത്ത് ഇറക്കി. ബാക്കിയുള്ളവര് ചേര്ന്ന് അഗ്നിനിയന്ത്രണ സംവിധാനങ്ങളും ജലവും ഉപയോഗിച്ച് തീ അണച്ചു.
സമീപത്ത് വിലപ്പെട്ട രേഖകള് ഉണ്ടായിരുന്നങ്കിലും അവിടേക്ക് തീ പടര്ന്നില്ല. ഏകദേശം പതിനഞ്ച് മിന്നിട്ട് സമയം കൊണ്ടാണ് തീ പൂര്ണ്ണമായും നിയന്ത്രണവിധേയമാക്കിയത്. അപ്പോഴേക്കും ആവണീശ്വരത്ത് നിന്നും ഫയര്ഫോഴ്സ് സംഘവും സ്ഥലത്തെത്തി. രാവിലെ മുതല് മേഖലയില് വൈദ്യുതി ഇല്ലായിരുന്നു. എസ്ബിടിയില് തീപിടിച്ചതറിഞ്ഞ് നിരവധിയാളുകളാണ് പുനലൂര് മൂവാറ്റുപുഴ പാതയില് തടിച്ചുകൂടിയത്. ആശങ്കപ്പെടേണ്ടതില്ലന്ന് ബ്രാഞ്ച് മാനേജര് അറിയിച്ചു.
