ഇരിക്കൂര്: കല്ലുകൊത്തല് കാരണം ഇല്ലാതായിക്കൊണ്ടിരിക്കുന്ന നാട് അതിന്റെ ചെറുത്ത് നില്പ്പ് ശക്തമായി തുടരുന്നു. ജൈവവൈവിധ്യവും പൈതൃകവും പേറുന്ന ബ്ലാത്തൂര് തവളപ്പാറയിലെ അനധികൃത ചെങ്കല് ഖനനം തടയുന്നതിന് ജനകീയ കൂട്ടായ്മ ഒരുങ്ങികഴിഞ്ഞു. പടിയൂര്-കല്ല്യാട് ഗ്രാമപഞ്ചായത്തിലെ ബ്ലാത്തൂര് തവളപ്പാറ എന്ന സ്ഥലത്ത് 11/1 എന്ന റീ സര്വ്വേ സ്ഥലത്താണ് വ്യാജ പട്ടയമുണ്ടാക്കി ചെങ്കല് ഖനനം നടത്തുന്നത്. എന്നാല് ഭൂമാഫിയയുടെ പ്രവര്ത്തനത്തെ ശക്തമായി എതിര്ത്ത് നാട്ടുകാര് രംഗത്തെത്തിക്കഴിഞ്ഞു. ജൈവവൈവിധ്യ പ്രത്യേകതകളും നൂറുകണക്കിന് അപൂര്വ്വയിനം ജീവികളും സസ്യങ്ങളുമാണ് തവളപ്പാറ എന്ന പ്രദേശത്തിന്റെ പ്രത്യേകത. ഈ ജൈവവൈവിധ്യ കേന്ദ്രത്തിന്റെ സര്വ്വനാശത്തിന് തുടക്കം കുറിച്ചാണ് ജിയോളജി വകുപ്പിന്റെയോ പഞ്ചായത്തിന്റെയോ അനുമതി ഇല്ലാത്തെ ഖനനം. ബ്ലാത്തൂരിന് സമീത്തുള്ള കല്ല്യാട്, ഊരത്തൂര്, കക്കട്ടുംപാറ, പെരുങ്ങാട്ടുപറമ്പ് എന്നിവിടങ്ങളിലെ ചെങ്കല് പാളികള്. 25 വര്ഷത്തെ ഖനനം കൊണ്ട് പൂര്ണ്ണമായി ഇല്ലാതായി. ഈ പ്രദേശത്തെ ആയിരത്തിലധികം ഹെക്ടര് പ്രദേശമാണ് ഇല്ലാതായത്. ഖനനം ചെയ്ത് ജനവാസ യോഗ്യമല്ലാതായ പ്രദേശത്ത് കടുത്ത കുടിവെള്ളക്ഷാമവും പാരിസ്ഥിതിക പ്രശ്നങ്ങളും അലട്ടുകയാണ്.
ശാസ്ത്രസാഹിത്യ പ്രവര്ത്തകരും വീക്കീപീഡിയ പ്രവര്ത്തകരും നടത്തിയ പഠനത്തില് പ്രദേശത്ത് 450 ലേറെ സപുഷ്പി സസ്യങ്ങള്, അമ്പതോളം ചിത്രശലഭങ്ങള്, 20 ഇനത്തോളം തുമ്പികള് എന്നിവയെ ഒരു ദിവസം തന്നെ രേഖപ്പെടുത്തിയിരുന്നു. പശ്ചിമഘട്ട മേഖലയിലെ വംശനാശഭീഷണി നേരിടുന്ന നായുരുപ്പ, കൂനന്പാല, ലോഹിതപൂ, മൂര്ഡാനിയപ്പുല്ല്, നീര്മ്മുറി, കുഞ്ഞ്നെയ്യല് തുടങ്ങിയവയാണ് കണ്ടത്തിയത്.
2012ല് കേരളത്തില് കണ്ടെത്തിയ പര്പ്പിള് സ്പോര്ട്ടഡ് ഫില്ട്ടര് എന്ന അത്യപൂര്വ്വ ചിത്രശലഭത്തിന്റെ ലാര്വകള് ഭക്ഷണമാക്കുന്ന വേട്ടുവകുറ്റി എന്ന സസ്യവും ഊരത്തൂര്പാറയില് കണ്ടെത്തിയിരുന്നു. സമുദ്ര നിരപ്പില് നിന്ന് 169 അടി ഉയരത്തില് സ്ഥിതി ചെയ്യുന്ന പ്രദേശമാണിത്.
സര്ക്കാര് മാര്ക്ക് ചെയ്ത ഗ്രീന് ലാന്റ് ഭൂമിയും മറ്റുമാണ് സ്വകാര്യ വ്യക്തികള് കയ്യേറി ഖനനം നടത്തുന്നതെന്ന് വ്യക്തമാണ്. ഈ പ്രശ്നത്തിനെതിരെ നിരവധി പരാധികളും കേസുകളും നിലവിലുണ്ട്. വ്യാജരേഖ നിര്മ്മിച്ച് ജൈവ വൈവിധ്യം നിലനില്ക്കുന്ന ഈ പ്രദേശത്തെ നശിപ്പിക്കുന്ന നടപടിക്കെതിരെ നടപടിയെഎടുക്കണമെന്നാണ് തവളപ്പാറ സംരക്ഷണ സമിതി പ്രവര്ത്തകരുടെ ആവശ്യം.
