ഇരിട്ടി: തങ്ങളുടേതായ എല്ലാ പിഴവുകളും കേന്ദ്രം ഭരിക്കുന്ന മോദി സര്ക്കാറിന്റെ തലയില് കെട്ടിവെച്ച് കേന്ദ്രത്തിനെതിരെ സമരം ചെയ്തുകൊണ്ട് കേരളത്തിലെ ജനങ്ങളെ തെറ്റിദ്ധരിപ്പിക്കുകയാണ് പിണറായിയുടെ നേതൃത്വത്തിലുള്ള കേരളാ സര്ക്കാരെന്ന് ബിജെപി സംസ്ഥാന സെല് കോഡിനേറ്റര് കെ.രഞ്ജിത്ത് പറഞ്ഞു. ബിജെപി പേരാവൂര് നിയോജക മണ്ഡലം കമ്മിറ്റിയുടെ ആഭിമുഖ്യത്തില് മണ്ഡലത്തിലെ പ്രവര്ത്തകര്ക്കായി സംഘടിപ്പിച്ച 25 മണിക്കൂര് നീണ്ടു നില്ക്കുന്ന പണ്ഡിറ്റ് ദീനദയാല് ഉപാദ്ധ്യായ പ്രവര്ത്തക പരിശീലന ശിബിരം പുന്നാട് നിവേദിതാ വിദ്യാലയത്തില് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ഇടത് പക്ഷം വന്നാല് എല്ലാം ശരിയാവും എന്ന് പറഞ്ഞവര് ഇവിടുത്തെ പ്രശ്നങ്ങള് പരിഹരിക്കാനല്ല പകരം പ്രശ്നങ്ങള് സൃഷ്ടിക്കുകയാണ് ചെയ്തുകൊണ്ടിരിക്കുന്നത്. സംസ്ഥാനത്തെ എല്ലാ അനുകൂലമായ സാഹചര്യങ്ങളെയും മനസ്സിലാക്കുകയും ജനങ്ങളോട് പ്രതിബദ്ധതാ പൂര്വ്വം ചുമതലാ ബോധത്തോടെ അവരിലേക്ക് ഇറങ്ങിച്ചെല്ലാന് ഓരോ പ്രവര്ത്തകനും കഴിയണമെന്ന് ദ്ദേഹം പറഞ്ഞു
മണ്ഡലം പ്രസിഡന്റ് പി.എം.രവീന്ദ്രന് അദ്ധ്യക്ഷത വഹിച്ചു. ജില്ലാ വൈസ് പ്രസിഡന്റ് മോഹനന് മാനന്തേരി, ജില്ലാ ജനറല് സെക്രട്ടറി അഡ്വ. വി.രത്നാകരന്, ജില്ലാ സെക്രട്ടറി കൂട്ട ജയപ്രകാശ്, സംസ്ഥാന കൗണ്സില് അംഗം പി.കൃഷ്ണന്, മണ്ഡലം ജനറല് സെക്രട്ടറിമാരായ സത്യന് കൊമ്മേരി, എം. ആര്. സുരേഷ് തുടങ്ങിയവര് പ്രസംഗിച്ചു. ക്യാമ്പ് ഇന്ന് വൈകുന്നേരം സമാപിക്കും.
