ന്യൂദല്ഹി: വണ്റാങ്ക് വണ് പെന്ഷന് നടപ്പാക്കിയതായും വിരമിച്ച സൈനികര്ക്കുള്ള മുഴുവന് തുകയും കൈമാറിയതായും കേന്ദ്രധനമന്ത്രി അരുണ് ജെയ്റ്റ്ലി പറഞ്ഞു. ചെറിയ പ്രശ്നങ്ങളുള്ളത് ബാങ്കുകളില് മാത്രമാണെന്നും ജയ്റ്റ്ലി പറഞ്ഞു. പത്തുവര്ഷത്തെ യുപിഎ ഭരണകാലത്ത് വണ്റാങ്ക് വണ് പെന്ഷനെപ്പറ്റി ചിന്തിക്കാന് പോലും തയ്യാറാകാത്ത രാഹുല് ഗാന്ധി ഇപ്പോള് രംഗത്തെത്തിയത് പരിഹാസ്യമാണെന്നും കേന്ദ്രധനമന്ത്രി പറഞ്ഞു.
കേന്ദ്രസര്ക്കാര് പദ്ധതിയുമായി ബന്ധപ്പെട്ട മുഴുവന് തുകയും ബാങ്കുകളിലേക്ക് നല്കിക്കഴിഞ്ഞിട്ടുണ്ട്. ചെറിയ ചില പ്രശ്നങ്ങളുള്ളത് ബാങ്കുകളിലാണ്. ഇത്രവലിയ തുക എത്തുമ്പോള് കണക്കുകൂട്ടലുകളില് സംഭവിക്കുന്ന ചെറിയ പിഴകളാണ് നിലവിലുള്ളത്. അവ എത്രയും വേഗം പരിഹരിക്കാനാണ് ശ്രമിക്കുന്നതെന്നും അരുണ് ജെയ്റ്റ്ലി മാധ്യമപ്രവര്ത്തകരോട് പറഞ്ഞു.
വിമുക്ത ഭടന് ആത്മഹത്യ ചെയ്ത സംഭവത്തെ രാഷ്ട്രീയവല്ക്കരിക്കുന്നതിനെ നിശിചമായി വിമര്ശിച്ച അരുണ് ജെയ്റ്റ്ലി, ദുരന്തത്തെ ഇത്തരത്തില് ഉപയോഗിക്കാന് തയ്യാറായ പ്രതിപക്ഷത്തെ നേതാക്കളെ കുറ്റപ്പെടുത്തി. ആശുപത്രി ഐസിയുവിന് മുന്നില് പോലും പലരും രാഷ്ട്രീയ നാടകം കളിക്കുകയാണ്. കൂടുതല് ഉത്തരവാദിത്വത്തോടെയുള്ള പ്രവര്ത്തനം ഇവരില് നിന്നും പ്രതീക്ഷിക്കുന്നതായും ജയ്റ്റ്ലി പറഞ്ഞു.
എന്നാല് വണ്റാങ്ക് വണ് പെന്ഷന് പദ്ധതി രാജ്യത്ത് നടപ്പാക്കിയിട്ടില്ലെന്ന് രാഹുല്ഗാന്ധി ആരോപിച്ചു. പെന്ഷന് വര്ദ്ധനവ് മാത്രമാണ് നടപ്പാക്കിയതെന്നും രാഹുല് ആരോപിച്ചു. എട്ടുവര്ഷം പ്രതിരോധമന്ത്രിയായിരുന്ന എ.കെ ആന്റണിയും വണ്റാങ്ക് വണ് പെന്ഷനെതിരെ രംഗത്തെത്തി.
