കണ്ണൂര്: വരാനിരിക്കുന്ന കനത്ത വരള്ച്ച മുന്കൂട്ടിക്കണ്ട് മഴവെള്ള സംരക്ഷണത്തിന് ജന പങ്കാളിത്തത്തോടെ വിപുലമായ പരിപാടികള്ക്ക് ജില്ല ഒരുങ്ങുന്നു. ജില്ലാ പഞ്ചായത്തിന്റെയും ജില്ലാ ഭരണകൂടത്തിന്റെയും മുന്കയ്യില് തദ്ദേശ സ്ഥാപനങ്ങളുടെയും വിവിധ വകുപ്പുകളുടെയും ഏജന്സികളുടെയും നേതൃത്വത്തിലാണ് ജലസംരക്ഷണ-ബോധവല്ക്കരണ പരിപാടികള് ആരംഭിക്കുന്നത്. ജില്ലാ ഇന്ഫര്മേഷന് ഓഫീസ് ശേഖരിച്ച സ്ഥിതിവിവരക്കണക്ക് പ്രകാരം ജില്ലയിലെ ഒന്നേകാല് ലക്ഷത്തോളം കുടുംബങ്ങള് കുടിവെള്ളക്ഷാമം നേരിടുന്നതായി കണ്ടെത്തിയിരുന്നു.
ഇതിനായി ഏഴിന് രാവിലെ 10.30ന് േമയര്, ജില്ലാ പഞ്ചായത്ത് അംഗങ്ങള്, ജില്ലയിലെ ഗ്രാമ, ബ്ലോക്ക് പഞ്ചായത്ത് പ്രസിഡണ്ടുമാര്, നഗരസഭാ ചെയര്മാന്മാര്, കുടുംബശ്രീ സിഡിഎസ് ചെയര്പേഴ്സണ്മാര്, ഹൈസ്ക്കൂള്, ഹയര് സെക്കണ്ടറി, കോളേജ് എന്എസ്എസ് വിഭാഗങ്ങള്, വിദ്യാഭ്യാസ ഡെപ്യൂട്ടി ഡയറക്ടര്, പഞ്ചായത്ത് ഡെപ്യൂട്ടി ഡയറക്ടര് തുടങ്ങിയവരുടെ യോഗം ചേരും.
ഓരോ പ്രദേശത്തും മഴവെള്ളം ശേഖരിക്കുന്നതിനും സംരക്ഷിക്കുന്നതിനും ആവശ്യമായ പ്രവര്ത്തന പദ്ധതികള് യോഗത്തില് തീരുമാനിക്കും. ഇതിനായി വാട്ടര് അതോറിറ്റി, ജലസേചന വകുപ്പ്, ഭൂഗര്ഭ ജലവകുപ്പ്, കൃഷി വകുപ്പ്, ദാരിദ്ര്യലഘൂകരണ വിഭാഗം എന്നിവ പ്രത്യേക പ്രായോഗിക പ്രവര്ത്തന പരിപാടികള് തയ്യാറാക്കും. പാടശേഖര സമിതി ഭാരവാഹികള്, തൊഴിലുറപ്പ് പദ്ധതി ചുമതലയുള്ള ഗ്രാമ പഞ്ചായത്ത് അസി. സെക്രട്ടറിമാര് എന്നിവരുടെ യോഗം ഏഴിന് പകല് 12 മണിക്കും ജില്ലാ പഞ്ചായത്ത് കോണ്ഫറന്സ് ഹാളില് ചേരും.
ജില്ലാ പഞ്ചായത്ത് പ്രസിഡണ്ട് കെ.വി.സുമേഷിന്റെ അധ്യക്ഷതയില് ചേര്ന്ന വിവിധ വകുപ്പ് മേധാവികളുടെ യോഗം ഇതു സംബന്ധിച്ച കാര്യങ്ങള് ചര്ച്ച ചെയ്തു. പുഴ, തോട്, ജലാശയങ്ങള് എന്നിവയുടെ നവീകരണം, ഉപയോഗിക്കുന്നതും അല്ലാത്തവയുമായ കിണര്റീച്ചാര്ജിംഗ്, മഴക്കുഴി നിര്മാണം, തടയണയും മണ്കയ്യാലയും നിര്മിക്കല്, വിസിബികളുടെയും ചെക്ക്ഡാമുകളുടെയും അടിയന്തിര അറ്റകുറ്റപ്പണി തുടങ്ങിയ പ്രവര്ത്തനങ്ങള് തദ്ദേശസ്ഥാപനങ്ങളുടെയും ജനങ്ങളുടെയും പങ്കാളിത്തത്തോടെ ചെയ്യും. സമയബന്ധിതമായി ഇവ നിര്വഹിക്കാന് പ്രവര്ത്തന കലണ്ടര് തയ്യാറാക്കി നല്കും.
സാധ്യമാകുന്ന ഇടങ്ങളിലെല്ലാം വ്യാപകമായി മഴവെള്ള സംഭരണികള് നിര്മിക്കാനും നടപടിയുണ്ടാകും. ഇതോടൊപ്പം ജനങ്ങളില് ജലസംരക്ഷണത്തിന്റെ ആവശ്യകതയെക്കുറിച്ചും വരള്ച്ചനേരിടാന് കൈക്കൊള്ളേണ്ട നടപടികളെക്കുറിച്ചും ശക്തമായ ബോധവല്ക്കരണത്തിനും പദ്ധതി ലക്ഷ്യമിടുന്നു. യോഗത്തില് ജില്ലാ പഞ്ചായത്ത് സ്റ്റാന്റിംഗ് കമ്മിറ്റി ചെയര്മാന് കെ.പി.ജയബാലന് മാസ്റ്റര്, ജില്ലാ ഇന്ഫര്മേഷന് ഓഫീസര് ഇ.കെ.പത്മനാഭന് എന്നിവര് സംബന്ധിച്ചു.
